“Хәләл” фондын тәкъдир итү

Кичә, 2007 елның 27 ноябрендә юстиция министры ярдәмчесе М.Х.Хәсәнов Эрмитаж-Казан үзәгендә узган “БКС — “Хәләл” фонды” акцияләрнең ачык пайлы инвестиция фондын төзүгә багышланган конференция эшендә катнашты. Яңа ПИФ күмәк россия инвестицияләр базарында уникаль продукт булачак. Фонд мөселман инвесторлары өчен күздә тотыла, алар үзләренең акча чаралары бары тик Исламда рөхсәт ителгән финанс инструментларына гына юнәлүенә исәп тота алалар.

“БКС — “Хәләл” фонды” ПИФы белән идарә итү кысаларында УК БКСның инвестиция эшчәнлеге Ислам нормаларына туры килүне контрольдә тотуны “Зәм-зәм +” автоном коммерциячел булмаган оешма гамәлгә ашырачак. Фонд составына “Ислам принциплары нигезендә инвестицияләү өчен килештерелгән кыйммәтле кәгазьләр исемлеге”нә кертелгән россия компанияләренең акцияләре генә керәчәк. Исемлекне ай саен “Зәм-зәм +” АКбО карап раслаячак. Шулай итеп, “БКС — “Хәләл” фонды” пайчыларының инвестицияләре әлеге дин кануннары нигезендә җайга салыначак.

“Бүген Россиядә 20 млн.нан артык мөселман яши, - дип хәбәр итте конференциядә катнашучыларга “Зәм-зәм +” АКбО советы рәисе, Кол Шәриф мәчете имамы, Татарстан Республикасы мөселманнары Диния нәзарәте каршындагы Галимнәр советы җитәкчесе Рамил хәзрәт Юнысов. – Шулай да бүгенгә кадәр безнең дин кануннары күзлегеннән күмәк инвестицияләр алар өчен рөхсәт ителми иде. УК БКС идарәсендәге “БКС — “Хәләл” фонды” россия мөселманнары өчен финанс базарының яңа мөмкинлекләрен ачты һәм Россиядә беренче тулысынча мөселман хокукы нормаларына туры килә торган инвестиция продукты булды”.

УК БКСның яңа ПИФы төзелү вакыты 12 ноябрьдән 2008 елның 8 февраленә кадәр дәвам итәчәк. Фондың мөлкәте бәясе 2008 елның 8 февраленә кадәр 10 млн сумга җиткән очракта, аның төзелүе тәмамланачак. “БКС — “Хәләл” фонды” ПИФына инвестицияләрнең минималь күләме 5000 сум була, алга таба сатып алганда – 1000 сумнан. Яңа фонд УК БКСның продукт сызыгында 11 ваклап сатулы ПИФ булачак.

“Дөньяви практикада халыкның аерым бер тар төркемен, шул исәптән конфессиональ төркемен күздә тоткан финанс продуктлары киң таралган – дип билгеләп үтте "Брокеркредитсервис”ның Казан филиалы директоры Николай Лаптев. – Шулай, бу елның август аенда Dow Jones халыкара индекс агентлыгы BRIC илләре (Бразилия, Россия, Һиндстан һәм Кытай) өчен махсус “ислам” индексы эшләде, аңа илнең 58 эре компаниясе керә. Һәм УК БКС мондый махсус инвестиция продуктларын төзү буенча халыкара тәҗрибәне Россиядә уңышлы тормышка ашырды.