Автономияле учреждениеләр халыкка дәүләт хезмәте күрсәтү процессында актив катнаша башладылар

“Автономияле учреждениеләр турында” Федераль закон көченә кергән көнннән бер елдан азрак вакыт үтте, ә Татарстан Республикасында инде унлаган шундый учреждение актив эшкә тотынды. Әлеге күрсәткеч буенча безнең республика Россия Федерациясендә иң алдынгы урыннарның берсен биләп тора. Халыкка дәүләт хезмәте күрсәтүнең  сыйфатын күтәрү өчен билгеләнгән автономияле учреждениеләр бигрәк тә мәгариф, сәламәтлек саклау, халыкны социаль яклау, физик культура һәм спорт өлкәләрендә төзелгән.

Кичә Татарстан Республикасы Министрлар Кабинетында Татарстан Республикасы Премьер-министрының беренче урынбасары Р.Ф.Моратов рәислегендә узган киңәшмә республикада автономияле учреждениеләр турында законны тормышка ашыру мәсьәләләренә, аларның барлыкка килүе һәм үсүе проблемаларына багышланган иде. Киңәшмәдә автономияле учреждениеләр эшчәнлегенең нәтиҗәлелеген күтәрү, дәүләт хакимияте органнары һәм җирле үзидарә органнары ягыннан дәүләт һәм му­ни­ци­паль мөлкәттән файдалануны тикшерүдә тоту проблемалары, шулай ук автономияле учреждениеләрнең идарә органнарын төзү мәсьәләләре хакында фикер алыштылар. Автономияле учреждениеләрнең оештыру-хокукый механизмын һәм дәүләт ярдәме күрсәтү системасын төзү кирәклеге билгеләп үтелде, бу аларның мөстәкыйльлеген һәм үз эшләре нәтиҗәләре өчен җаваплылыкларын күтәрергә ярдәм итәргә тиеш.

 Киңәшмә эшендә Татарстан Республикасы юстиция министры М.М.Корманов, Татарстан Республикасы хезмәт, эш белән тәэмин итү һәм социаль яклау министры А.Р.Шәфигуллин, Татарстан Республикасы сәламәтлек саклау министры А.З.Фәррахов, Татарстан Республикасы Министрлар Кабинеты Аппаратының, республика министрлыклары һәм ведомстволарының җаваплы хезмәткәрләре катнаштылар.