Нотариаль гамәлләр башкару буенча семинар

Бүген ТР Мәдәният министрлыгының конференц-залында “Җирлекләрнең җирле үзидарә органнары вазыйфаи затларының аерым нотариаль гамәлләр кылуы” дигән темага муниципаль районнар җирлекләренең җирле үзидарә органнары вазыйфаи затлары белән Татарстан Республикасы Юстиция министрлыгы видеоконференция режимында оештырган семинар-киңәшмә үтте.

Семинарны ТР юстиция министры М.М.Корманов ачты. Ул видеоконференциягә җыелучыларга семинарны оештыруның максаты турында мәгълүмат бирде: 2008 елның 15 гыйнварыннан җирлекләрнең җирле администрация башлыкларына (башкарма комитетлар җитәкчеләренә) һәм җирлекләрнең җирле үзидарәләрнең махсус вәкаләтле вазыйфаи затларына, нотариус булмаган очракларда, “Вәкаләтләр чикләүне камилләштерү белән бәйле Россия Федерациясенең аерым закон актларына үзгәрешләр кертү турында” 29.12.2006 елдагы 258-ФЗ номерлы Федераль закон нигезендә аерым нотариаль гамәлләр кылу хокукы бирелә.

Гражданнар өчен юридик нәтиҗәләргә ия  әлеге җаваплы эштә ярдәм күрсәтү өчен ТР Юстиция министрлыгы белгечләре аерым нотариаль гамәлләр кылу буенча тарату өчен мәгълүмати материал әзерләнеп һәм CD-дискларга урнаштырылып, муниципаль районнарга җибәрелде.

Семинар-киңәшмәдә аерым нотариаль гамәлләр кылу турында лекцияләр белән Татарстан Республикасы Нотариаль палатасы, Федераль теркәүгә алу хезмәтенең Татарстан Республикасы буенча идарәсе, Татарстан Республикасы Җир һәм мөлкәт мөнәсәбәтләре министрлыгы белгечләре чыгыш ясадылар.

ТР Юстиция министрлыгының Җирле үзидарә органнары белән багланышлар департаменты белгечләре 2008 елның гыйнварыннан Татарстан Республикасы муниципаль районнарына чыгып, шулай ук Казанда ҖҮИ органнары вазыйфаи затлары белән аерым нотариаль гамәлләр кылу буенча семинарлар үткәрә башлаячак. Семинарны ТР юстиция министры урынбасары А.А.Ощепков алып барды.