ТР Юстиция министрлыгы хезмәткәрләре “Чиста Татарстан урманнары” акциясендә урман фондын тәртипкә кертте

2012 елның 2 июнендәге шимбә көндә Татарстан Республикасында “Чиста Татарстан урманнары” табигатьне саклау республика акциясе үтте. Аның барышында Казан шәһәре тирәсендәге урман утыртмалары урманга килгән кешеләр тарафыннан урман юлларында һәм аланнарда ташлап калдырылган көнкүреш чүп-чарыннан чистартылды.

Боровое Матюшино поселогы, Чиста һәм Зәңгәр күлләр, Комлы Кавал торак пункты әйләнә-тирәсендәге табигать почмаклары – урманнарны чистартырга төрле министрлык һәм ведомстволарның хезмәткәрләре чыкты.

Урман фондын тәртипкә китерүдә Татарстан Республикасы Юстиция министрлыгы хезмәткәрләре дә үз өлешен кертте. Алар Биектау участок урманчылыгы территориясен чистарту эшенә иртәнге сәгать сигездә үк кереште. Урманны чистарту эше үзе авыр булмады, тик быелгы елда күпләп үрчегән озынборыннар гына эшләгәндә беркадәр комачаулык тудырды. Шуны билгеләп үтәргә кирәк: урмандагы чүп-чар озынборыннарга караганда беразга гына кимрәк булды. Юстициялеләргә хәтта чүп-чар өчен капчыклар да җитмәде. Чараны оештыручылар моның шулай буласын алдан белгәннәр, ахры, һәм табигый урманнарда ял итүчеләр ташлап киткән калдык-постыкларны җыю өчен өстәмә савытлар китертүне алдан хәл итеп куйганнар иде.

Юстиция министрлыгы командасы урманчы биргән йөкләмәләрне, бер нәрсәгә дә карамыйча, чын намус белән башкарып чыкты. Чүп-чар тутырылган капчыклар йөк машинасына төялгәч, акциядә катнашучылар утырган автобус шәһәргә таба кузгалды.

Урман фондын каты көнкүреш калдыкларыннан чистртуга юнәлтелгән “Чиста Татарстан урманнары” масштаблы еллык табигатьне саклау акциясен үткәрү Татарстан башкаласы тирә-юнендә яхшы экологик шартлар булдыруга гына түгел, ә иң элек республика гражданнары аңында әйләнә-тирә табигать мохитенә һәм аның байлыкларыннан дөрес файдалануга карата сакчыл, кайгыртучан караш булдыру максатын күздә тота һәм аны үти, дип ышанасы килә.

 

 

ТР Юстиция министрлыгының Матбугат хезмәте