Кама Тамагы районында Белем көне

1 сентябрьдә Россиядә Белем көне һәм яңа уку елы башлану билгеләп үтелә.

Сентябрьнең беренче көне һәрвакытта да гомумхалык бәйрәме итеп кабул ителә. Мәктәпләрдә, гадәт буенча, уку елы башлануга багышланган тантаналы линейкалар үткәрелә.

Яңа уку елының беренче көнендә Татарстан Республикасы юстиция министры М.М.Корманов Татарстан Республикасының Кама Тамагы муниципаль районы мәктәпләрендә узган бәйрәм чараларында катнашты. Юстиция министры М.М.Корманов муниципаль район башлыгы З.Г.Гәрәфиев белән бергә укытучылар һәм укучыларны, шулай ук аларның ата-аналарын яңа уку елы башлану белән тәбрик итте һәм төрле номинацияләрдә, шул исәптән спорт чараларында җиңүчеләр дип танылган мәктәп укучыларына бүләкләр бирде. Юстиция министры М.М.Корманов мәктәп укучыларына истәлеккә спорт тупларын тапшырды.

Район мәктәпләренә визиты барышында юстиция министры укучылар белән мәгълүмат-хокук сәгатьләре үткәрде, анда ул хәзерге заманның яшь кешесе, хокукый дәүләтнең булачак белгече һәм төзүчесе нинди сыйфатларга һәм нинди яхшы якларга ия булырга тиеш булу турында, республикада социаль-икътисадый программаның гамәлгә ашырылуы хакында сөйләде, укучылар һәм укытучыларның заманча мәктәп, югары уку йорты эшенә, белгечләр әзерләүгә һәм башка гомумсәяси мәсьәләләргә кагылышлы, шул исәптән экстремизм һәм терроризм белән көрәшкә юнәлтелгән чаралар турындагы сорауларына җавап бирде.

Шул ук көнне, 2012 елның 1 сентябрендә, Россия юристлары ассоциациясенең Татарстан төбәк бүлеге каршындагы Яшь юристлар советы проекты – “Хокук мәктәбе” үз эшен дәвам иттерде.

Совет әгъзалары Руслан Галиуллин һәм Тимур Какохо, Казан (Идел буе) федераль университетының 4 курс студентлары, Казан шәһәренең Вахитов районы 5 нче лицеенда терроризм һәм экстремизмга каршы көрәшкә багышланган хокук дәресе үткәрделәр.

Яшьләр мәгариф учреждениеләренең террорчылыктан якланган булуы һәм яңа уку елы башлану кебек һәм халык күп җыела торган башка тантаналы чараларның куркынычсызлыгы тәэмин ителү, 2013 ел Универсиадасы алдында әлеге теманың әһәмияте турында сөйләделәр.

Хокук дәресендә катнашучылар 3 сентябрьдә Россиядә Терроризмга каршы көрәштә теләктәшлек көне билгеләп үтелүне искә төшереп үттеләр. Бу Россиянең соңгы кертелгән яңа истәлекле датасы, ул Бесландагы фаҗигале вакыйгаләр белән бәйле. Ул көнне боевиклар шәһәр мәктәпләренең берсен кулга төшерделәр. Теракт аркасында мәктәптә өч йөздән артык кеше һәлак булды, шуларның 150 дән артыгы балалар иде.

Дәрес үткәрү барышында өлкән сыйныф укучылары тема буенча фикер алыштылар, тематик хокук биремнәрен чиштеләр, Татарстанда дини эшлеклеләргә һөҗүм итүгә, Христос Спаситель чиркәвендә «Pussy Riot» төркеменең кыланышы һәм җаза алуына һәм башкаларга кагылышлы күпсанлы кызыксындырган сорауларын бирделәр.

Лицей администрациясе укучыларга хокукый белем тарату мәсьәләләре буенча яшь юристлар белән хезмәттәшлекне яңа уку елында да дәвам итәргә чакырды.