Зеленодольск муниципаль районы составына керүче авыл җирлекләре башлыклары видеоэлемтә аша кабул ителде
Бүген республика муниципаль районнарының авыл җирлекләре башлыклары өчен чираттагы видеоэлемтә булды. Чара министр урынбасары Мөхәррәм Ибәтов җитәкчелегендә узды.
Чарада Зеленодольск муниципаль районы башлыгы урынбасары Эльза Кадникова, Зеленодольск муниципаль районы Советының юридик бүлек башлыгы Эльвира Нургалиева, Зеленодольск муниципаль районы составына керүче авыл җирлекләре башлыклары, шулай ук министрлык бүлекләре башлыклары катнашты.
Җирле үзидарә органнарына хокукый консультацион-методик ярдәм күрсәтү бүлеге башлыгы Майя Пашкова катнашучыларга җирле үзидарә турындагы законнардагы иң мөһим үзгәрешләр турында сөйләде.
Җирле үзидарә һәм муниципаль регистр алып бару өлкәсендә норматив хокукый эш бүлеге башлыгы Ралия Гарифуллина актларны муниципаль регистрга җибәрү һәм аларны законнарга туры китерү өлешендә Зеленодольск районы җирле үзидарә органнарының эше турында сөйләде.
Территориаль оештыру һәм җирле үзидарә өлкәсендә контрольне гамәлгә ашыру мәсьәләләре бүлегенең әйдәп баручы киңәшчесе Екатерина Никитина административ җаваплылыкка тарту турында беркетмәләр төзү буенча тапшырылган дәүләт вәкаләтләрен гамәлгә ашыру мәсьәләсенә кагылды.