ТР Юстиция министрлыгы: муниципаль актларны кануннарга туры китерү өлеше 3 процентка артты
Җирле үзидарә органнарының муниципаль актларда кануннарга туры килмәүләрне бетерү буенча эш нәтиҗәләре турында Татарстан Республикасы Юстиция министрлыгында узган киңәшмәдә фикер алыштылар. Киңәшмәне Татарстан Республикасы юстиция министры урынбасары Мөхәррәм Ибәтов үткәрде.
Татарстан Республикасы Рәисе Рөстәм Миңнеханов ярдәме белән һәм “Татарстан Республикасында юстицияне үстерү” дәүләт программасы кысаларында бу эштә “Кодекс” системасы актив ярдәмче булды.
Система автомат режимда хокукый җайга салудагы каршылыкларны һәм җитешсезлекләрне ачыклый. Система тәкъдимнәре гавами хакимият органнарына федераль һәм төбәк законнарындагы үзгәрешләргә төгәл җавап бирергә мөмкинлек бирә.
Үз чыгышында җирле үзидарә һәм муниципаль регистрны алып бару өлкәсендә норматив хокукый эш бүлеге башлыгы Ралия Гарифуллина агымдагы елның беренче яртыеллыгында җирле үзидарә органнарының системадагы эш йомгаклары турында сөйләде.
“Системаны куллану чорында барлыгы җирле үзидарә органнарының 43 меңнән артык актында кануннарга туры килмәү ачыкланды. 1 июльгә тиңдәшсезлекләр 36 мең актта яки 85% бетерелгән. Гомумән алганда, республика күрсәткече ел башы белән чагыштырганда 3% ка артты”, - дип хәбәр итте Ралия Расыйх кызы.
Элегрәк Татарстан Республикасы юстиция министры урынбасары Мөхәррәм Ибәтов муниципаль нормалар чыгару мәсьәләләренең Юстиция министрлыгы эшендә өстенлекле юнәлешләрнең берсе булып калуын, ә актларда законнарга туры килмәүләрне мәгълүмат технологияләрен кулланып үз вакытында бетерү – җирле әһәмияттәге мәсьәләләрне уңышлы хәл итүнең һәм халыкның тормыш сыйфатын яхшыртуның бер элементы булуын билгеләп үтте.