Татарстанда җәмәгать судьясының суд участогына Республика дәүләт хезмәтләре аша язылырга мөмкин

Татарстан Республикасы Юстиция министрлыгы гражданнарга җәмәгать судьяларының 190 суд участогына язылу мөмкинлеге турында искә төшерә. Татарстанлылар кайбер хезмәтләрне гадиләштерелгән тәртиптә алу өчен уңайлы электрон чираттан файдалана алалар.

“Җәмәгать судьясының суд участогына язылу өчен ТР Дәүләт хезмәтләре порталындагы “Правосудие онлайн” бүлегеннән файдаланырга кирәк. Кулланучыларга суд районын һәм суд участогы номерын күрсәтергә кирәк булачак”, - дип аңлата җәмәгать судьялары эшчәнлеген оештыру-хокукый тәэмин итү бүлегенең әйдәп баручы белгече Юлия Михайлова.

Электрон чират эш материаллары белән танышу, суд актлары бирү, башкару документлары алу, шулай ук архив материаллары бирү кебек мөһим хезмәтләр алырга мөмкинлек бирә. Моннан тыш, суд актларын аларның законлы көченә керү тамгасы белән бирү хезмәтенә дә ирешеп була.

Татарстан Юстиция министрлыгы республикада җәмәгать юстициясе өлкәсендә гражданнарның суд системасы белән үзара хезмәттәшлеген яхшыртуга юнәлдерелгән цифрлы трансформация проектларын актив рәвештә гамәлгә кертә. Бу инициативалар “Цифрлы икътисад” милли проекты кысаларында гамәлгә ашырыла.