Мөхәррәм Ибәтов: “Тарихын белмәгән халыкның киләчәге юк”
Татарстан Республикасы Милли музее филиалы булган “Юстиция тарихы” музей-мәгариф үзәгендә “... и моя секира!” дип аталган күргәзмә ачылды. Ватанны саклаучылар көненә багышланган әлеге күргәзмә килүчеләрне безнең эрага кадәр V меңъеллыктан башлап төрле кораллар коллекциясе белән таныштыра.
Ачылу тантанасында министр урынбасары Мөхәррәм Ибәтов катнашты, ул Татарстан Рәисе игълан иткән Хәрби батырлык һәм хезмәт фидакарьлеге елында мондый экспозицияне үткәрүнең символик булуын ассызыклады.
“Тарихын белмәгән халыкның киләчәге юк, - диде Мөхәррәм Ибәтов. - Бу корал хәрби куәт, ата-бабаларыбызның батырлыгы, хезмәте һәм фидакарьлеге символы”.
Күргәзмә тарихи коралларның бай коллекциясен тәкъдим итә. Анда безнең эрага кадәр III меңъеллык артефактларыннан башлап икенче бөтендөнья сугышы чоры үрнәкләренә кадәр бар.
Министр урынбасары чыгышында шулай ук экспозиция өчен мәйданчыкның уңышлы сайлануын да билгеләп үтте. “Урын символик рәвештә сайланган, чөнки дәүләт тарихында юстиция дә, корал да законны һәм тәртипне яклауга юнәлдерелгән”, - дип ассызыклады ул.
Мөхәррәм Ибәтов сүзләренчә, мондый чараларны уздыру патриотик тәрбия өчен аерым әһәмияткә ия: “Үз халкыңның тарихын һәм аның хәрби батырлыгын белү патриотизм белән тыгыз бәйләнгән. Ватанга, гаиләгә һәм бер-беребезгә мәхәббәт - ул безне көчлерәк итә торган кыйммәтләр”.
Күргәзмәне оештыручылар 2026 елның 19 февраленнән май ахырына кадәр эшләячәк экспозицияне карарга чакыра (Һ.Такташ ур., 124). Музейга билет алып яки Пушкин картасы белән керергә мөмкин.