Татарстанда җирле үзидарә турындагы законга федераль законнар нигезендә төзәтмәләр әзерләү төгәлләнә
“Татарстан Республикасы муниципаль берәмлекләре советы” Ассоциациясе президиумы утырышында Татарстан Республикасы юстиция министры Рөстәм Заһидуллин Татарстан Республикасында җирле үзидарә турындагы закон проектын эшләү турындагы доклад белән чыгыш ясады.
Республика Юстиция министрлыгы тарафыннан Рәис администрациясе, Дәүләт Советы, Министрлар Кабинеты Аппараты һәм Муниципаль берәмлекләр советы Администрациясе белән берлектә әзерләнгән закон проекты, җирле үзидарәнең тотрыклы системасы сакланып калганда, республика законнарын 33-ФЗ номерлы Федераль закон таләпләренә яраклаштырырга тиеш.
“Берничә вариантны җентекләп карап чыкканнан соң, без тулысынча яңа закон эшләмәскә, ә гамәлдәге законга үзгәрешләр кертергә дигән карар кабул иттек. Бу дәвамчанлыкны саклап калырга һәм җирле үзидарәнең ике дәрәҗәле моделен саклаганда мәсьәләләрне хокукый җайга салуны булдыруга ярдәм итәчәк”, - дип аңлатты министр.
Төп яңалыкларның берсе - муниципаль берәмлекләр депутатлары вәкаләтләренең бердәм биш еллык срогын билгеләү, вәкиллекле органнарның минималь санын билгеләү һәм муниципалитетларның вәкиллекле орган утырышларында дистанцион катнашу тәртибен билгеләү буенча вәкаләтләре барлыкка килү.
Закон проектында муниципаль берәмлекләр башлыклары статусына аерым игътибар бирелә. “Шәһәр округлары һәм муниципаль районнар башлыкларының дәүләт вазыйфалары һәм муниципаль вазыйфаларны бергә алып баруы мөһим нигезләмәләрнең берсе булып тора”, - дип ассызыклады Рөстәм Заһидуллин. Шулай ук Татарстан Республикасы Рәисе инициативасы буенча башлыкларны вазыйфаларыннан азат итү тәртибе һәм вәкаләтләрне вакытлыча башкаручыларны билгеләү механизмы карала.
Министр сүзләренә караганда, муниципаль берәмлекләр башлыкларын сайлауның гамәлдәге тәртибе әлегә үзгәрешсез кала, гәрчә 2030 елга, федераль законнар нигезендә, яңа формат билгеләргә кирәк булачак.
Республика һәм муниципаль дәрәҗәләр арасында вәкаләтләрне бүлүгә сизелерлек үзгәрешләр кертелде. “Закон проекты белән җирле үзидарә органнарына федераль законда каралган 65 вәкаләтнең 63е беркетелгән. Аларны бүлгәндә без җирле үзидарә турында республика законының гамәлдәге редакциясе салган принципны саклап калдык”, - дип билгеләп үтте министр.
Сүзен йомгаклап, министр закон проектын Татарстан Республикасы Дәүләт Советына 2026 елның 1 июненә кадәр кертү планлаштырылуын хәбәр итте һәм тәкъдим ителгән үзгәрешләр җирле үзидарә системасын яңа федераль таләпләргә нәтиҗәле җайлаштырырга, шул ук вакытта республика моделенең үзенчәлекләрен һәм казанышларын саклап калырга мөмкинлек бирәчәгенә ышаныч белдерде.