Чиновникка ышаныч бетү аны хезмәтеннән азат итү өчен нигез була

“Коррупциягә каршы тору өлкәсендә дәүләт тарафыннан идарә итүне камилләштерү белән бәйле Россия Федерациясенең аерым закон актларына үзгәрешләр кертү турында” 2011 елның 21ноябрендәге 329-ФЗ номерлы Федераль законга кул куелды. Ул чиновникларны ышаныч бетү сәбәпле хезмәтләреннән азат итәргә рөхсәт бирә.

Шуны аңлатып китү зарур, мондый нигез белән хезмәттән азат итү мәнфәгатьләр бәрелешен кисәтү һәм (яки) җайга салу буенча чаралар күрмәгән, керемнәр турында мәгълүматлар бирмәгән яисә ялган яки тулы булмаган мәгълүматлар биргән, коррупциягә тартылу турында хәбәр итмәгән өчен янарга мөмкин. Моннан тыш, чиновник эшкуарлык белән шөгыльләнгән, коммерция оешмасы белән идарә итү органнарында түләүле нигездә эшләгән, хөкүмәткә карамаган коммерциячел булмаган чит ил оешмалары органнары составына кергән өчен хезмәтеннән азат ителәчәк.

Шулай ук яңа законга ярашлы рәвештә федераль һәм төбәк парламентларының, төбәк, муниципаль берәмлекләрнең һәм җирле администрацияләрнең башлыклары хәзер үзләренең керемнәре, мөлкәтләре һәм мөлкәткә бәйле йөкләмәләре турында, гаилә әгъзаларының керемнәре турында белешмәләр бирергә тиеш булалар. Ә кредит бирә торган оешмалар, теркәү һәм салым органнары хакимият органнары җитәкчеләрен аларга буйсынган затларның, шулай ук дәүләт хезмәтенә дәгъва итүчеләрнең керемнәре һәм мөлкәтләре турында белешмәләр (операцияләр, исәпләр һәм кертемнәргә кагылышлы белешмәләрне дә кертеп) бирергә йөкләделәр. Моннан тыш, дәүләт хезмәткәрләре өчен билгеләнгән кайбер бурычлар, чикләүләр һәм тыюлар дәүләт корпорацияләре һәм фондлары хезмәткәрләренә, шулай ук дәүләт органы алдына куелган бурычларны үтәүче учреждениеләр һәм предприятиеләр хезмәткәрләренә таратылган. Мондый затларның исемлеге аерым билгеләнәчәк.

Бер-берсенең буйсынуында булып, бер үк органда хезмәт узу тыелган якын туганнар исемлегенә хәзер балаларының хәләл җефетләре кертелгән.

Кертелгән төзәтмәләргә таянып дәүләтнең шулай ук чиновникларның законсыз гамәлләре белән гражданнарга китерелгән зыянны түләү өчен сарыф ителгән акчаны кире кайтару мөмкинлеге барлыкка килә. Бу акчалар гаеплеләрдән регресс тәртибендә түләтеләчәк. Игътибар бирелгән яңа үзгәрешләрдән тыш, әлеге закон Россия Юстиция министрлыгының законнарга үзгәрешләр кертү проектларына коррупциягә каршы экспертиза үткәрү вәкаләтләрен тәгаенли. Төзәтмәләр белән шулай ук чиновниклар тарафыннан тапшырыла торган белешмәләрнең дөреслеген һәм тулылыгын тикшерү өчен оператив-эзләү чараларын үткәрү очраклары төгәлләштерелгән, коррупция бозулары турында җинаять эшләренең судта каралуы тәгаенләнгән. Әлеге закон, гамәлгә керүнең бүтән вакыты каралган аерым нигезләмәләрдән тыш, рәсми басылып чыккан көненнән 10 көннән соң гамәлгә керә.