РФ нең аерым закон актларына үзгәрешләр кертү турында

2011 елның 3 декабрендә “Коррупциягә каршы тору өлкәсендә дәүләт идарәсен камилләштерү белән бәйле Россия Федерациясенең аерым закон актларына үзгәрешләр кертү турында” 2011 елның 21 ноябрендәге 329-ФЗ номерлы Федераль закон үз көченә керә. Аның белән Россия Федерациясенең бер төркем закон актларына үзгәрешләр кертелә, аерым алганда, “Россия Федерациясендә җирле үзидарә оештыруның гомуми принциплары турында” 2003 елның 6 октябрендәге 131-ФЗ номерлы Федераль законга.

Соңгысының җирлек, муниципаль район һәм шәһәр округының җирле әһәмияттәге мәсьәләләрен регламентлаштыра торган 14, 15 һәм 16 статьяларына тиешле җирлек, муниципаль район һәм шәһәр округы чикләре эчендә ришвәтчелеккә каршы тору чараларын гамәлгә ашыру вәкаләтләре өстәлгән. Шулай ук, бу законда

муниципаль берәмлек башлыгы, җирле администрация башлыгы, муниципаль берәмлекнең вәкиллекле органы депутатларының “Коррупциягә каршы тору турында” 2008 елның 25 декабрендәге 273-ФЗ номерлы Федераль законда һәм башка федераль законнарда билгеләнгән чикләүләрне һәм тыюларны үтәргә һәм бурычларын башкарырга тиеш булулары билгеләнгән.

Моннан тыш, 131-ФЗ номерлы Федераль законның 74.1 статьясындагы 2 өлешкә 4 нче пункт өстәлде, аның нигезендә муниципаль берәмлек башлыгын хезмәттеннән азат итү өчен “Коррупциягә каршы тору турында” 2008 елның 25 декабрендәге 273-ФЗ номерлы Федераль законда һәм башка федераль законнарда билгеләнгән чикләүләр һәм тыюларның үтәлмәве һәм бурычларның башкарылмавы нигез була.

Кертелгән үзгәрешләргә бәйле рәвештә Татарстан Республикасы Юстиция министрлыгының Хокук мәсьәләләре буенча җирле үзидарә органнары белән багланышлар оештыру департаменты тарафыннан муниципаль районнар һәм шәһәр округларының башлыклары исеменә муниципаль берәмлекләр уставларын 131-ФЗ номерлы Федераль законның күрсәтелгән үзгәрешләренә оператив рәвештә туры китерү буенча эшне оештыруны сораган мәгълүмат хаты җибәрелде.

 

ТР Юстиция министрлыгының матбугат хезмәте