Җирле әһәмияттәге мәсьәләләр исемлеге киңәйтелде

2011 елның 18 ноябрендәге 89-ТРЗ номерлы Татарстан Республикасы Законы белән “Татарстан Республикасында җирле үзидарә турында” Татарстан Республикасы Законына үзгәрешләр кертелде.

Федераль законнар нигезендә җирлекләр һәм шәһәр округларының җирле әһәмияттәге мәсьәләләренә парковкалар (парковка урыннары) булдыру һәм аларның эшчәнлеген тәэмин итү мәсьәләләре кертелгән.

Җирле әһәмияттәге мәсьәләләргә вәкаләтле участок полициясе вазыйфасын биләүче хезмәткәргә җирлекнең хезмәт күрсәтелә торган административ участогында эшләү өчен бина бирү кертеп каралган. 2017 елның 1 гыйнварына кадәр вәкаләтле участок полициясе вазыйфасын биләүче хезмәткәргә һәм аның гаилә әгъзаларына хезмәткәр күрсәтелгән вазыйфа буенча бурычларын үти торган чорга торак урыннар бирелә.

Җирле үзидарә органнары өстәмә рәвештә муниципаль лотереялар уздыруга муниципаль контрольне; махсус икътисадый зона территориясендә муниципаль контрольне гамәлгә ашыра; җирлек ихтыяҗлары өчен ясалма җир кишәрлекләрен булдыру буенча кирәкле эшләр башкаруны тәэмин итә.

Муниципаль берәмлекләрнең вәкиллекле органнарында фракцияләр һәм башка депутат берләшмәләре эшчәнлеге тәртибе регламентлаштырылган. Фракциягә исем бирү, аны теркәү, аннан бермандатлы яки күпмандатлы сайлау округлары буенча сайланган депутатларның чыгу һәм фракция эшчәнлеге туктатылу тәртибе мәсьәләләре җайга салынган.

Закон, 2012 елның 1 гыйнварыннан гамәлгә керә торган аерым нигезләмәләреннән гайре, рәсми басылып чыккан көненнән үз көченә керә.

Закон "Республика Татарстан" газетасының 2011 ел, 26 ноябрь, N 237 санында, "Ватаным Татарстан" газетасының 2011 ел, 29 ноябрь, N 237 санында басылып чыкты.

 

 ТР Юстиция министрлыгының матбугат хезмәте

Материал «Гарант» мәгълүмат-хокук базасын файдаланып әзерләнде.