“Хокук мәктәбе” Татарстанның Кама Тамагы районында сайлау хокукы буенча лекторий үткәрде

Россия юристлары ассоциациясенең Татарстан төбәк бүлеге каршындагы Яшьләр бүлекчәсе хокукый агарту чараларын үткәрү кысаларында республикада социаль юнәлтелгән проектларны тормышка ашыру белән шөгыльләнә. Болар: халыкка түләүсез юридик ярдәм күрсәтү, мәктәп укучыларына хокук бәйгеләренә әзерләнүдә булышу, авыл мәктәпләрендә укучылар өчен “Хокук мәктәбе” проекты, хокукый нигилизмга каршы көрәш һәм башкалар.

2012 елның 8 февралендә Яшь юристлар Советы әгъзалары “Хокук мәктәбе” проекты кысаларында Татарстан Республикасы Кама Тамагы муниципаль районындагы мәктәпләрдә сайлау хокукы буенча лекцияләр белән чыгыш ясадылар. Лекция темасын Россия Президентына сайлаулар алдыннан район мәктәпләрендә җәмәгать белеме укытучылары билгеләде. Муниципаль райондагы 7 мәктәпнең 9 – 11 сыйныфлары укучылары, педагоглары һәм администрацияләре “Сайлау хокукы” темасы буенча лекторияләрдә катнаштылар. Алар кайбер мәктәпләрдә презентация рәвешендә булса, икенчеләрендә лекцияләр һәм хокук дәресендә катнашучыларның актив диалогы рәвешендә булды. Хокук сәгатьләрен үткәрү барышында балалар үзләрен кызыксындырган сорауларны бирделәр һәм үзләре үк төзегән хокукый хәлләрне хәл итүдә катнаштылар. Алар нигездә узган Дума сайлауларыннан алынган тәэсирләрдән һәм уйланулардан барлыкка килгән иде. Лекторларның фикеренчә, хокук сәгатендә битарафлар һәм боегып утыручылар булмады: мәктәп укучылары тормышта актив булырга омтылалар һәм алдагы тормышта кирәк булачак хокук белемнәренә ия булуны мөһим саныйлар. Районның 200 дән артык укучысы һәм педагогы әлеге хокук лекторияләрендә катнашты.

“Хокук мәктәбе” проекты авыл җирлегендәге мәктәп укучылары арасында гына түгел, ә мәктәп администрацияләре һәм укытучылар тарафыннан да югары бәяләнде. “Хокук мәктәбе” инде язга яңа социаль заказ алды: алар уку елы ахырында район мәктәпләренең чыгарылыш укучыларын, администрация һәм педагогларын “Мәгариф турында” Федераль закон нигезләмәләре белән таныштырачак. “Хокук мәктәбе” лекторлары мәктәп директорлары һәм укучыларына кабат очрашачакларын белдерделәр һәм законнардагы яңалыклар турында, мәктәптән чыгуга һәм дә югары һәм урта махсус уку йортларына керүгә кагылышлы яңа кагыйдәләр хакында сөйләргә ышандырдылар.

 

ТР Юстиция министрлыгының Матбугат хезмәте