Яшь юристлар советы утырышы

2012 елның 20 мартында Татарстан Республикасы Юстиция  министрлыгында Россия юристлар ассоциациясенең Татарстан төбәк бүлеге каршындагы Яшь юристлар советы утырышы булды. Көн кадагына Татарстан буенча “Чиста сайлау өчен” күзәтүчеләр корпусының хисабы һәм эшенә йомгак ясау, Совет эшчәнлегендәге көндәлек мәсьәләләр, шулай ук бу елның апрель-май айларына план куелган иде.

Советның рәисе Станислав Александров Татарстанда Күзәтүчеләр корпусының эш нәтиҗәләре турында җиткерде. Җәмәгать башлангычларында 3000 яшь юрист җәлеп ителде. Алар, тиешле әзерлек узганнан соң, Татарстандагы барлыгы 2853 сайлау участогына билгеләнде. “Корпус булдыру буенча җитди эш башкарылды. Бу исә күзәтүчеләребезнең барлык участокларда да булуын тәэмин итте. Бу эш 100%ка башкарылды”, - дип хәбәр итте С.Александров. Совет рәисе сайлауның законга ярашлы рәвештә узуын һәм легитим булуын ассызыклады. Аерым тискәре хәлләр һәм кимчелекләр дә булган, әмма бу очраклар күбрәк гражданнарның хокукый культурасы түбән дәрәҗәдә булу белән аңлатыла. Тулаем алганда, сайлау яхшы, ачык һәм чиста үткән. Төп сайлау процедураларында җитди бозулар күзәтелмәгән.

Аннары Яшь юристлар советының Татарстанның юридик факультетларындагы һәм югары уку йортларындагы эшчәнлеге, аерым алганда, студентлар һәм уку йортларын тәмамлаганнар белән үзарә мөнәсәбәтләр мәсьәләләре турында фикер алышынды. Югары уку йортлары каршында эшләп килүче юридик кликалар белән эш өлкәсенә, аерым алганда, аларның эшчәнлеген Россия юристлар ассоциациясенең халыкка түләүсез юридик ярдәм күрсәтү буенча бердәй стандартларга якынайтуга аерым игътибар бирелде. Киләсе ике айда өлкән сыйныфлар укучылары өчен “Хокук мәктәбе” кысаларында Татарстанның авыл җирлекләренә һәм Казан шәһәре районнарына лекцияләр белән сәфәрләр оештыру күздә тотыла. Чыгышлар мәктәп җәмәгатьчелеге арасында зур кызыксыну уята торган “Мәгариф турында” Федераль законга багышланачак. Май аена планга яшь юристларны гражданлык-патриотлык рухында тәрбияләү кысаларында бер рәт чаралар үткәрү, шулай ук Ассоциациянең Яшь юристлар советы вәкилләренең Санкт-Петербург шәһәрендәге Өченче Яшьләр юридик форумында актив катнашуы кертелде.

 

ТР Юстиция министрлыгының Матбугат хезмәте