ТР Арча һәм Питрәч муниципаль районнарында хокук бозуларны профилактикалау мәсьәләләре буенча комплекслы тикшерү оештыру турында

Татарстан Республикасы Хөкүмәтенең хокук бозуларны профилактикалау комиссиясенең эшче төркеме әгъзалары Татарстан Республикасы Юстиция министрлыгында узган оештыру киңәшмәсендә катнашты. АларТатарстан Республикасы Арча һәм Питрәч муниципаль районнарында хокук бозуларны профилактикалау мәсьәләләре буенча комплекслы тикшерүнең оештыру эшләре турында фикер алышты.

Татарстан Республикасы Премьер-министрының беренче урынбасары, Татарстан Республикасы Хөкүмәтенең хокук бозуларны профилактикалау комиссиясе рәисе Р.Ф.Моратовның йөкләмәсе нигезендә 2012 елның 24-26 апрелендә эшче төркем хокук бозуларны профилактикалау эшенең ничек оештырылуын, аерым алганда, алкогольле продукция, сыра, тәмәкенең чиктән тыш күп кулланылуын профилактикалау һәм халыкның сәламәт яшәү рәвешен булдыру эшенең оештырылуын өйрәнәчәк.

План-йөкләмәдә каралганча, хокук бозуларны профилактикалау эшен комплекслы өйрәнүне үткәрү максатын 2011-2014 елларга Татарстан Республикасында хокук бозуларны профилактикалау буенча комплекслы программаның үтәлешен тикшерүдә тоту һәм җирле үзидарә органнарының алкоголизм һәм наркоманияне профилактикалау эшчәнлеген тикшерү, шулай ук тикшерү вакытында ачыкланган җитешсезлекләрне бетерүдә практик ярдәм күрсәтү тәшкил итә.

Төрле министрлык һәм ведомстволар вәкилләреннән гыйбарәт эшче төркем әгъзалары, расланган сораулар исемлегендә каралганча, һәркем үзенең эшчәнлек юнәлеше буенча муниципаль районнарда хокук бозуларны профилактикалау эшенең ничек оештырылуын өйрәнәчәк.

“Муниципаль районнарның һәм шәһәр округларының җирле үзидарә органнарына административ комиссияләр төзү һәм аларның эшчәнлеген оештыру буенча Татарстан Республикасы дәүләт вәкаләтләрен бирү турында” 2005 елның 30 декабрендәге 144-ТРЗ номерлы Татарстан Республикасы Законы нигезендә ТР Юстиция министрлыгының Хокукый мәсьәләләр буенча җирле үзидарә органнары белән үзара хезмәттәшлек оештыру департаменты белгечләре, эшне комплекслы өйрәнү кысаларында, югарыда аталган районнарның административ комиссияләре эшчәнлеген тикшерәчәк.

Өйрәнү нәтиҗәләре Татарстан Республикасы Хөкүмәтенең хокук бозуларны профилактикалау комиссиясе утырышы көн кадагына куелачак.

Бүген эшче төркем әгъзалары күрсәтелгән районнарда тикшерү эшен башладылар.

Киңәшмәне Татарстан Республикасы юстиция министры, эшче төркем җитәкчесе М.М.Корманов алып барды.

 

ТР Юстиция министрлыгының Матбугат хезмәте