Татарстан Республикасы Юстиция министрлыгы коллегиясе утырышында

Бүген Татарстан Республикасы Юстиция министрлыгында Татарстан Республикасы юстиция министры М.М.Корманов рәислегендә Министрлык коллегиясе утырышы булды. Көн тәртибенә “Татарстан Республикасы җәмәгать судьялары эшчәнлеген оештыру, шул исәптән матди-техник яктан тәэмин итү турында” мәсьәлә куелды.

Утырышта Татарстан Республикасы юстиция министры урынбасары Н.В.Рагозина төп нотык белән чыгыш ясады.

Нотыкта ТР җәмәгать судьялары эшчәнлеген матди-техник тәэмин итү буенча үткәрелә торган эш турында мәгълүмат бирелде, аерым алганда, оештыру-хокукый характердагы гамәлләр комплексын башкару, суд участокларын компьютер техникасы белән тәэмин итү, суд эшен башкару процессын автоматлаштыручы программалар белән тәэминатны булдыру, Интернет челтәренә барлык суд участокларын да тоташтыру һәм суд участокларында мәгълүмат технологияләрен куллану турында сүз барды. Суд эшендә катнашучыларга эшне карау урыны, көне һәм вакыты турында хәбәр итү өчен СМС-хәбәр куллану 2012 елның яңалыгы булып торуга аерым игътибар бирелде.

Н.В.Рагозина үз чыгышында капиталь ремонтлау башкарыла торган һәм бу эшнең якын арада төгәлләнүе көтелгән, шулай ук аның билгесез вакытка озайтылган объектларын билгеләп узды.

Коллегия утырышында Татарстан Республикасында Суд департаменты идарәсенең хокукый мәгълүматлаштыру бүлеге җитәкчесе А.Т.Ибраһимов чыгыш ясады. Нотыкчы гомуми юрисдикция судларында һәм ТР Югары Судында мәгълүмат технологияләре белән эшләү тәҗрибәсе, судларның эшен автоматлаштыру һәм гражданнарга оператив мәгълүмат бирү өчен кулланыла торган яңа модульләр эшләү турындагы уй-фикерләре белән уртаклашты.

Нотык турында фикер алышу һәм коллегиядә катнашучыларның чыгышлары барышында коллегия карары проектына карата мәгълүматлаштыру, техник хезмәт күрсәтү эшендә кадрлар тәэминаты мәсьәләләрендә Татарстан Республикасында Суд департаменты идарәсе белән уртак хезмәттәшлеккә, шулай ук кайбер объектларда ремонтны оператив төгәлләүгә кагылышлы җитди күрсәтмәләр бирелде.

Коллегия мәсьәләләре турында фикер алышуда ТР Югары Суды рәисе И.И.Гыйләҗев, ТР Министрлар Кабинеты Аппаратының Хокук идарәсе җитәкчесе Р.Ф.Гафиятуллин катнашты.

 

 

ТР Юстиция министрлыгының Матбугат хезмәте