Спас муниципаль районында гражданнарны кабул итү

2012 елның 24 маенда Татарстан Республикасы Спас муниципаль районында Иске Рәҗәп һәм Никольский авыл җирлекләрендә яшәүчеләргә түләүсез юридик ярдәм күрсәтү буенча күчмә кабул итү булды. Кабул итү барышында 52 район кешесенә хокукый ярдәм күрсәтелде. Кабул итүне, республика муниципаль районнарындагы авыл җирлекләре халкына түләүсез юридик ярдәм күрсәтү буенча Татарстан Республикасы Юстиция министрлыгы белән Россия юристлар ассоциациясенең Татарстан төбәк бүлегенең уртак проектын гамәлгә ашыру барышында урнашкан тәртипкә ярашлы рәвештә, төрле министрлык һәм ведомстволарның белгечләреннән тупланган мәгълүмат-консультация бирүче төркем алып барды.

Иске Рәҗәп авыл җирлегендә узган  кабул итүгә җирлекнең Ветераннар советы рәисе Зиннәтулла Гайзатулла улы  Гайзатуллин килде. Ул иҗтимагый вазыйфаларын башкару, шулай ук үз ветераннар оешмасы әгъзаларының йөкләмәләрен үтәүгә кагылышлы күпсанлы киңәш-тәкъдимнәр алды. З.Г.Гайзатуллин күрсәтелгән хокукый ярдәм өчен мәгълүмат-консультация бирүче төркем белгечләренә ветераннар оешмасы әгъзалары исеменнән олы рәхмәтен белдерде һәм авыл мәктәбе укучылары белән бергә оештырылган Иске Рәҗәп авылының туган якны өйрәнү тарихи музеен карарга чакырды. З.Г.Гайзатуллин – бик актив һәвәскәр. Элек ул шул мәктәптә тарих һәм туган якны өйрәнү дәресләрен укыткан һәм шул ук мәктәпнең директоры булган. Үз авылының барлыкка килү музеенда Петр I чорыннан тарихны чагылдырган. Хәзер дә тарих музее өчен экспонатлар туплавын дәвам итә, авылдашларына Оборона министрлыгы архивы аркылы Бөек Ватан сугышында хәбәрсез югалган солдатларны һәм якташларының күмелгән урыннарын эзләргә ярдәм итә. Авылда авыл җирлегенең Ветераннар советы җитәкчесе тырышлыгы белән халыктан җыелган акчага Бөек Ватан сугышы елларында һәлак булган якташ сугышчыларга һәйкәл куелган.

Мәгълүмат-консультация бирүче төркем белгечләре кызыклы һәм һәвәскәр кеше белән очрашу, күргән һәм ишеткәнннәре турында истәлек итеп, Зиннәтулла абый белән фотого төштеләр. Зиннәтулла абый әлеге фотосурәтне соңыннан музейга җибәрүләрен үтенде. Шулай ук тарих өчендер, мөгаен.

    

 

ТР Юстиция министрлыгының Матбугат хезмәте