Татарстан Республикасы Юстиция министрлыгында 12 нче эшче төркем утырышы булды

Агымдагы елның 4 октябрендә ТР Юстиция министрлыгында эшче төркем җитәкчесе, Россия Федерациясе Федераль Собраниесе Дәүләт Думасы депутаты М.М.Галимәрдәнов рәислегендә Татарстан Республикасы икътисадына федераль бюджет акчасын җәлеп итү мәсьәләсе буенча 12 нче эшче төркем утырышы булды.

Утырышта республика министрлыкларыннан һәм федераль башкарма хакимиятнең Татарстан Республикасы территориясендә федераль максатчан программаларны гамәлгә ашыру белән шөгыльләнүче территориаль органнарыннан вәкилләр катнашты.

Утырыш барышында эшче төркем әгъзалары түбәндәгеләр хакында фикер алыштылар:

- булышлык күрсәтелә торган федераль программаларны гамәлгә ашыру һәм финанслау барышы, шул исәптән, 2012 елда федераль бюджеттан бүлеп бирелә торган акчаны үзләштерү мәсьәләләре, шулай ук 2013 елга һәм якын киләчәккә заявкалар булдыру мәсьәләләре;

- 12 нче эшче төркем әгъзаларының Татарстан Республикасы Икътисад министрлыгы һәм Татарстан Республикасы Юстиция министрлыгы белән булышлык күрсәтелә торган федераль программалар буенча үзара хезмәттәшлек итү тәртибе;

- 12 нче эшче төркемгә беркетелгән федераль максатчан программалар кураторларының 2012 елның 1 октябренә башлангыч эш нәтиҗәләре.

Киңәшмә нәтиҗәләре буенча эшче төркем әгъзалары Кама инновацион территориаль-җитештерү кластеры территориясендә капиталь салулар таләп иткән объектлар буенча әлеге объектларны тиешле федераль программалар буенча финанслауга кертү максатын күздә тоткан тәкъдимнәрне ике атна эчендә Татарстан Республикасы Икътисад министрлыгына кертергә дигән күрсәтмә бирелде. 12 нче эшче төркемнең чираттагы утырышы агымдагы елның дүртенче кварталында булачак.

 

ТР Юстиция министрлыгының матбугат хезмәте