ТР икътисадында акчаның яшерен әйләнешен киметүгә карата тәкъдимнәр кертү буенча эшче төркем эшчәнлеге турында

Бюджет акчасын кулланганда хокук бозуларга каршы торуны активлаштыру, законсыз финанс чараларын юк итү, икътисадның күләгәдә калучы секторы эшчәнлеген чикләүче законнарны камилләштерүгә юнәлтелгән тәкъдимнәр кертү, законсыз финанс операцияләренә каршы тору механизмына контрольне көчәйтү һәм киңәйтү максатларында, Татарстан Республикасы Министрлар Кабинетының 2012 елның 16 июлендәге 1184-р номерлы карары нигезендә Татарстан Республикасы икътисадында акчаның яшерен әйләнешен киметүгә карата тәкъдимнәр кертү буенча эшче төркем оештырылды. Эшче төркемнең төп максатлары һәм бурычлары түбәндәгеләрдән гыйбарәт:

Татарстан Республикасында акчаның яшерен әйләнеше торышына комплекслы анализ ясау;

тискәре күренешләрне үз вакытында ачыклау, Татарстан Республикасы икътисадында акчаның яшерен әйләнеше өлкәсендә урнаша торган хәлнең алга таба үсешен фаразлау, тиешле тәкъдимнәр эшләү һәм кертү;

бюджет акчаларын кулланганда хокук бозуларга каршы торуның яңа рәвешләрен һәм алымнарын уйлап табу, законсыз финанс схемаларын юк итү;

икътисадның күләгәдә калган өлеше эшчәнлеген чикләүче законнарны камилләштерүгә юнәлтелгән тәкъдимнәр эшләү, законсыз финанс операцияләренә каршы тору механизмнарын тикшереп торуны көчәйтү һәм киңәйтү;

Татарстан Республикасы террриториясендә акчаның яшерен әйләнешен киметү чараларын камилләштерү мәсьәләләре буенча министрлык, ведомство һәм оешмаларның уртак боерыклары, күрсәтмәләре, мәгълүмат хатлары проектлары һәм башка оештыру-эш бирү документлары проектларын эшләүдә катнашу;

федераль башкарма хакимият органнарының Татарстан Республикасы буенча территориаль органнары, Татарстан Республикасы башкарма хакимияте органнары, Татарстан Республикасындагы җирле үзидарә органнары, шулай ук оешмаларның бюджет  акчасыннан файдаланганда хокук бозуларга каршы тору, законсыз финанс схемаларын юк итү буенча чараларны гамәлгә ашыру мәсьәләләре буенча үзара хезмәттәшлек итүен тәэмин итү;

Татарстан Республикасы икътисадында акчаның яшерен әйләнешен киметү чараларын гамәлгә ашыру нәтиҗәләре турында мәгълүмати-аналитик һәм бүтән материалларны Россия Федерациясе һәм Татарстан Республикасы дәүләт хакимияте органнарына җибәрү өчен әзерләүдә катнашу.

Эшче төркем, югарыда санап кителгән максатлар һәм бурычларны күздә тотып, Татарстан Республикасы икътисадында акчаның яшерен әйләнешен киметүгә карата тәкъдимнәр эшләде һәм үз эшчәнлекләрендә акча исәп-хисабының “караңгы” схемаларын куллануда тотылган оешмаларны ачыклады (исемлек теркәп бирелә).

Законсыз финанс схемаларын кулланучы юридик затларның эшчәнлеген чикләү һәм акчаның яшерен әйләнешен киметү буенча чараларны тормышка ашыру максатларында,Татарстан Республикасы Прокуроры, Татарстан Республикасы Арбитраж суды, Татарстан Республикасы Милли банкы, Федераль салым хезмәтенең Татарстан Республикасы буенча идарәсе, шулай ук Татарстан Республикасы буенча Эчке эшләр министрлыгының тәкъдимнәрен исәпкә алып”Россия Федерациясенең аерым закон актларына үзгәрешләр кертү хакында” федераль закон проекты (алга таба – закон проекты) эшләнде, анда Россия Федерациясе Граждан кодексына, Россия Федерациясе Салым кодексына, Россия Федерациясе Җинаять кодексына һәм “Юридик һәм индивидуаль эшкуарларны дәүләт теркәвенә кую турында” 2001 елның 8 августындагы 129-ФЗ номерлы, “Җаваплылыгы чикләнгән җәмгыятьләр турында” 1998 елның 8 августындагы 14-ФЗ номерлы, “Акцинер җәмгыятьләр турында” 1995 елның 26 декабрендәге 208-ФЗ номерлы , “Җинаятьчел юл белән табылган керемнәрне легальләштерүгә һәм террорчылыкны финанслауга каршы тору турында” 2001 елның 7 августындагы 115-ФЗ номерлы федераль законнарга үзгәрешләр кертү каралган.

Закон проекты Хокук мәсьәләләре буенча ведомствоара координацияләү комитетының Экспертлар Советының 2012 елның 4 октябрендә булган утырышында каралды. Фикер алышудан соң, закон проектын Россия Федерациясе Хөкүмәте белән килештерү таләп ителү турында карар кабул ителде.