Үз түбәң булуга ни җитә!

Узган 12 октябрь җомгасында Ютазы район үзәгенең иҗтимагый тормышында күркәм вакыйга булды: Җәмәгать судьясы йорты кулланылышка тапшырылды. Тантаналы чарада республиканың юстиция министры Мидхәт Корманов, Югары суды рәисе Илгиз Гыйләҗев, Ютазы районы администрациясе башлыгы Рөстәм Нуриев, шулай ук Татарстанның көньяк-көнчыгыш районнарындагы район, шәһәр судларыннан вәкилләр катнашты.

Моңа кадәр җирле җәмәгать судьясы элеккеге район хастәханәсе администрациясенең тузган бинасында урнашкан иде. Бер ел элек элеккеге мәктәптән тыш эшләү үзәге бинасының беренче катын җәмәгать судьясына бирү турында карар кабул ителгән иде. Әмма анда кереп урнашканчы, шактый гына төзелеш эшләре башкарырга туры килде: бина реконструкцияләнде һәм ремонтланды. Казаннан килгән югары дәрәҗәдәге кунаклардан соң, Рөстәм Нуриев сүз алып, бинаны төзекләндерүдә, район бюджетыннан финансланудан тыш, район советы депутатлары – районның сәнәгать предприятиеләре җитәкчеләре ярдәменең зур булуын билгеләп үтте. Республика бюджеты акчасына җиһазлар сатып алынды. Юстиция министры район җәмәгать судьясын 2013 ел программасы буенча яңа оргтехника белән җиһазлауда ярдәм итәргә сүз бирде.

Шулай итеп, җәмәгать судьясы коллективы үз эшен бүгенге көннән соң бөтен уңайлыклары, әйтик, аппарат хезмәткәрләренең үз эш бүлмәләре, суд утырышлары залы, архив, җәмәгать судьясы бүлмәсе һәм башка бүлмәләр булган 200 квадрат метрлы бинада башкарачак.

ТР Юстиция министрлыгының матбугат хезмәте