Хокук мәсьәләләре буенча ведомствоара координацияләү комитеты утырышы турында

20 октябрьдә Татарстан Республикасы Министрлар Кабинетының утырышлар залында Хокук мәсьәләләре буенча ведомствоара координацияләү комитетының чираттагы утырышы булды.

Утырышта 9 мәсьәлә каралды.

Җир салымын түләү торышын ача торган белешмә-аналитик материалларны эшләп бетерү һәм аны җыюны яхшыртуның өстәмә чаралары турында һәм җир кишәрлекләренә кадастр хакын билгеләү белән бәйле проблемаларны комплекслы хәл итүдә Казан шәһәренең ярдәм итүе турында Татарстан Республикасы Президенты Р.Н.Миңнехановка юллана торган хезмәт хаты проектын әзерләү барышы хакында Казан шәһәре башкарма комитеты җитәкчесенең беренче урынбасары Р.К.Нигъмәтуллин җиткерде. Ул шулай ук Казан шәһәрендә җир кишәрлекләренең кадастр бәясен дәгълау буенча суд процесслары һәм суд карарларын яңадан карау турында сөйләде.

Дәгъва белдерелгән җир кишәрлекләре буенча эшләрне судка кадәр һәм судта җайга салу буенча суд эшләренең торышына мониторинг оештыру һәм Татарстан Республикасы Җир һәм мөлкәт мөнәсәбәтләре министрлыгы тарафыннан күрелә торган чаралар турындагы мәсьәләне ТР Җир һәм мөлкәт мөнәсәбәтләре министрлыгының бәя кую бүлеге җитәкчесе Л.Г.Швецова яктыртты. Л.Г.Швецова моның белән бергә ХМбВКК әгъзаларына җир салымын киметү турында реклама белдерүләренең эчтәлеген анализлау нәтиҗәләре, шулай ук моңа бәйле рәвештә ТР Җир һәм мөлкәт мөнәсәбәтләре министрлыгы тарафыннан күрелгән чаралар турында җиткерде.

Җир кишәрлекләренең кадастр бәясен төшерү һәм җир салымын киметү турында тәкъдимнәрне ММЧда урнаштырган затларны җаваплылыкка тарту мөмкинлеге турындагы мәсьәлә буенча Федераль монополиягә каршы хезмәтенең Татарстан Республикасы буенча идарәсе җитәкчесе урынбасары А.В.Березкин чыгыш ясады.

Моннан тыш, утырышта Татарстан Республикасы Министрлар Кабинетының азкатлы күпфатирлы йортлар төзү барышын тикшереп торуны көчәйтүгә юнәлтелгән карары проекты каралды. Аны Татарстан Республикасы Төзелеш, архитектура һәм торак-коммуналь хуҗалык министрлыгы тәкъдим иткән иде. Аны эшләп бетергә дигән карар чыгарылды.

ХМбВКК каравына, күрсәтелгән мәсьәләләрдән тыш, ике закон проекты тәкъдим ителде. “Россия Федерациясенең аерым закон актларына үзгәрешләр кертү турында” федераль закон проекты һәм “Балыкчылык һәм су биологик ресурсларын саклап калу турында” Федераль законның 26 статьясына үзгәрешләр кертү хакында” федераль закон проекты Вологда өлкәсе Закон чыгару Собраниесенең охшаш закон чыгару инициативасы Россия Федерациясе Федераль Собраниесе Дәүләт Думасында каралганчы кичектерелде.

“Россия Федерациясе Җинаять кодексына үзгәрешләр кертү турында” федераль закон проекты хупланды һәм аны эшләүчеләр тарафыннан Татарстан Республикасы Министрлар Кабинетына кертергә, дигән тәкъдим ясалды.

 

ТР Юстиция министрлыгының матбугат хезмәте