Юстиция министры Рөстәм Заһидуллин студентлар белән очрашу үткәрде
Татарстан Республикасы юстиция министры Рөстәм Илдус улы Заһидуллин дәүләт граждан хезмәте һәм муниципаль хезмәтнең максатлары һәм бурычлары турында белем бирү чараларын уздыру кысаларында Казан (Идел буе) федераль университеты студентлары белән очрашты.
Әңгәмә барышында студентлар Татарстан Республикасы дәүләт граждан хезмәтенең максатлары, функцияләре, бурычлары һәм социаль әһәмияте, дәүләт хезмәтендә эшләү өстенлекләре, дәүләт хезмәткәрләренең заманча шартларда роле һәм үзләренең функциональ бурычларын һәм һөнәри этикасын катгый үтәү кирәклеге турында белделәр.
Рөстәм Илдус улы яшь белгечкә конкурс сайлап алуын ничек узарга һәм дәүләт хезмәтенә керергә икәнлеге турында сөйләде, дәгъвачыларга карата куелган таләпләргә тукталды.
“Хезмәткә керү күбесенчә конкурс процедуралары аша башкарыла. Дәгъвачыларның профессиональ дәрәҗәсе, аларның квалификация таләпләренә туры килүе бәяләнә. Конкурс комиссиясе утырышы алдыннан рус телен, РФ Конституциясен, ТР Конституциясен, дәүләт граждан хезмәте, коррупциягә каршы тору турындагы законнарны, вакантлы вазыйфага конкурс игълан ителгән хакимият органының мәгълүмат технологияләре һәм тармак компетенцияләре өлкәсендәге законнарны белүгә тест үткәрү мәҗбүри”, - дип хәбәр итте министр.
Министр шулай ук студентлар белән Татарстан Республикасы Конституциясе турында да сөйләште, республикабыз өчен истәлекле дата, аны кабул итүгә 30 ел тулу турында искәртте. Ул Татарстан Конституциясенең республиканың Төп законы буларак хокукый әһәмиятен һәм аны өйрәнү кирәклеген билгеләп үтте.
Очрашу ахырында Рөстәм Илдус улы студентларга уңышлар, актив тормыш позициясе, якты һәм кызыклы студент тормышы теләде!