Халыкка бердәм түләүсез юридик ярдәм күрсәтү көне

Безнең сайтта хәбәр ителгәнчә, 20 сентябрьдә безнең республиканың теләсә кайсы гражданы теге яисә бу проблема буенча квалификацияле белгеч-юристларга мөрәҗәгать итә ала. Мондый мөмкинлек Халыкка бердәм түләүсез юридик ярдәм күрсәтү көнендә мөмкин була. Исегезгә төшерәбез, бу чара республикада квартал саен Россия юристлары ассоциясенең Татарстан төбәк бүлекчәсе инициативасы буенча Татарстан Республикасы Юстиция министрлыгы ярдәме белән уздырыла.
Бу көнне түләүсез юридик ярдәм республиканың барлык территориясендә 56 пунктта күрсәтелә. “Бердәм Россия” партиясенең җирле бүлекчәләре базасында һәр муниципаль районда җәмәгатьчелекне кабул итү урыннары әзерләнә. Россия юристлары ассоциясе Татарстан төбәк бүлекчәсенең халыкка түләүсез юридик ярдәм күрсәтүнең биш үзәге эшли, болар: Казан, Чаллы һәм Түбән Кама шәһәрләре. Консультация сорап, шулай ук Россия Федерациясе Президентының Татарстан Республикасындагы кабул итү бүлмәсендә һәм “Бердәм Россия” партиясе рәисенең Казандагы региональ җәмәгатьчелекне кабул итү бүлмәсендә, Россия Федерациясе Президентының Идел буе федераль округында тулы вәкаләтле вәкиленең Чаллыдагы җәмәгатьчелекне кабул итү бүлмәсендә мөрәҗәгать итәргә мөмкин.
Җәмәгатьчелекне кабул итү бүлмәләренең ишекләре 9:00 сәгатьтән алып 17:00 сәгатькә кадәр шәһәрләрдә, 8:00 сәгатьтән алып 16:00 сәгатькә кадәр авыл районнарында ачык иде.
Татарстан Республикасы Прокуратурасы, Татарстан Республикасы Конституция суды, Россия Федерациясе Юстиция министрлыгының Татарстан Республикасы буенча идарәсе хезмәткәрләре, адвокатлар һәм нотариуслар эксперт-консультантлар ролендә булды.
Татарстан Республикасы юстиция министры М.М. Корманов, аның беренче урынбасары С.Н.Столяров, республика прокурорының беренче урынбасары А.Ю.Николаев, Россия Федерациясе Юстиция министрлыгының Татарстан Республикасы буенча идарәсе башлыгы урынбасары М.В.Скирда, бер-берен алмаштырып, Россия Федерациясе Президентының кабул итү бүлмәсендә 15 гражданны кабул итте.
Казанда 10 участокта 82 граждан түләүсез юридик ярдәм алды. Алабуга шәһәрендә 51 кеше мөрәҗәгать итте.
Нотариуслар бу көнне – 152 кеше, адвокатлар – 150, прокуратура хезмәткәрләре – 94 кеше кабул итте.
Түләүсез юридик ярдәм күрсәтүне сорап, пенсионерлар күбрәк мөрәҗәгать итә. Иң күп бирелә торган сораулар арасында – ызанлау, җиргә милекчелек, хосусыйлаштыру, дача амнистиясе һәм башка мәсьәләләр.
ТР Юстиция министрлыгы Матбугат үзәге .