Татарстан халкы мобиль кушымта аша түләүсез юридик ярдәм ала алачак
Квалификацияле юридик ярдәм алу хокукы конституциядә күрсәтелгән гарантия булып тора. Шул ук вакытта, Россия Конституциясе нигезендә, аерым очракларда мондый ярдәм түләүсез күрсәтелә. Татарстанда 300 меңнән артык кеше түләүсез юридик ярдәм алырга хокуклы.
Татарстан Республикасы Юстиция министрлыгы республикабыз халкына түләүсез юридик ярдәм күрсәтүнең төрле формаларын эзлекле рәвештә киңәйтә.
Бүген Татарстан Юстиция министрлыгы, ТР Дәүләт юридик бюросы һәм “Социаль карта” акционерлык җәмгыяте килешү имзалады. Аның кысаларында республика халкы “Татарстан Республикасында яшәүче картасы”мобиль кушымтасында түләүсез юридик ярдәм алачак.
Түләүсез юридик ярдәм “Сервислар” кушымтасында күрсәтеләчәк, анда элемтә ысулын сайларга мөмкин булачак: бу телефоннар, электрон почта, яисә кирәкле урыннарны (ФИО, телефон номеры, үз хәлләрегезне тасвирлагыз) тутырып мөрәҗәгатьне язу.
“Сервис кушымтаның барлык кулланучыларына түләүсез юридик ярдәм турында мәгълүмат җиткерергә һәм бер үк вакытта дәүләт юридик бюросына хокукый мәсьәлә белән электрон рәвештә мөрәҗәгать итү мөмкинлеген тәэмин итәргә мөмкинлек бирәчәк, - дип аңлатты Татарстан Республикасы юстиция министры Рөстәм Заһидуллин. - Әгәр гражданинның ниндидер сораулары калса, кушымта аша безнең белән дә, Юстиция министрлыгы белән дә элемтәгә керергә мөмкин булачак”, - дип өстәде ул.
“Түләүсез юридик ярдәм” сервисын 2024 елның икенче яртыеллыгында эшләтеп җибәрергә планлаштыралар.