Җир мәсьәләләре буенча Свияжскка сәфәр киңәшмәсе

Узган көнне Свияжскта “Татарстанның мәдәни мирасы: борынгы Болгар шәһәре һәм Свияжск утрау-шәһәре” комплекслы проектның гамәлгә ашырылуны тәэмин итү кысаларында җир мөнәсәбәтләренең хәл ителмәгән мәсьәләләре буенча сәфәр киңәшмәсе узды. Сәфәрдә Татарстан Республикасы юстиция министры М.М.Корманов һәм Татарстан Республикасы җир һәм мөлкәт мөнәсәбәтләре министры А.К.Хамаев катнаштылар.

Киңәшмә барышында Свияжск утравында электр, газ һәм су белән тәэмин итү объектларын, шулай ук автомобиль юлын төзү, шул исәптән дәүләт яисә муниципаль ихтияҗлар өчен җир кишәрлекләрен сатып алу мәсьәләләре хакында фикер алышынды.

Җир кишәрлекләрен алу буенча байтак мәсьәләләр туганга күрә юстиция министры М.М.Корманов Свияжскта яшәүче халык белән киңәшмә уздырды. Шунда җир кишәрлекләренең милекчеләренә җир кишәрлекләрен дәүләт яисә муниципаль ихтияҗлар өчен сатып алу процедурасы аңлатылды.

РФ Граждан һәм Җир кодекслары нигезендә юстиция министры җир кишәрлекләрен дәүләт яисә муниципаль ихтияҗлар өчен сатып алу шартлары һәм тәртибе, җир кишәрлегенең сатып алу бәясен билгәләү тәртибе, дәүләт яисә муниципаль ихтияҗлар өчен алынган җир кишәрлекләренә хокукларның, алардан файдалануның туктатылу тәртибе, дәүләт яисә муниципаль ихтияҗлар өчен сатып алынган җир кишәрлегенең милекчесе хокуклары турында, шулай ук җир кишәрлегенең бәясе нәрсәдән гыйбарәт икәнлеге, җир кишәрлеген алу сәбәпле милекчегә китерелгән чыгымнар турында тулы аңлатма бирде.

 

ТР Юстиция министрлыгы Матбугат Үзәге