Беренче яшьләр юридик форумында Татарстан делегациясе

Билгеле булганча, 2010 елның 2 июлендә Санкт-Петербургта Беренче яшьләр юридик форумы узды. Аның эшчәнлегендә Россиянең барлык регионнарыннан, шул исәптән Татарстаннан 400 гә якын 3-5 курс студенты катнашты.

Яшь юристлар түбәндәге мәсьәләләр хакында фикер алыштылар: “Юрист булу нәрсәне аңлата?”, “Форумда катнашучылар ни өчен юридик белем алырга карар кылганнар?”, һәм шулай ук юрист этикасы, юрист һөнәренең җәмгыятьтәге роле турында.

Форум президиумы әгъзалары катнашучылар белән үзләренең тәҗрибәләре белән бүлештеләр, шул ук вакыта студентлар билгеләнгән мәсьәләләргә карата ирекле формада үзләренең фикерләрен дә белдерә алдылар. 1,5 сәгатьлек ирекле фикер алышудан соң форум эшчәнлеге өч секциягә бүленде: яшь юристлар активлыгының социаль формасы, юридик клиникалар, профессиональ юридик этика.

Татарстан Республикасы делегатлары барлык секцияләр эшчәнлегендә дә катнаштылар. Казан студентларына Татарстан Республикасында түләүсез юридик ярдәм күрсәтү өлкәсендә ирешкән уңышлар турында хәбәр итәргә мөмкинлек булды, юридик ярдәм күрсәтүнең берничә проектын, республикада гамәлгә ашырыла торган белем бирү программаларын тәкъдим иттеләр һәм студентлар өчен практика үткәрүне үстерү турында тәкъдим керттеләр. Тәкъдим ителгән проектларның кайсы берләре форумда катнашучыларның игътибарын җәлеп иттеләр. Россия юристлары Ассоциациясе Идарәсе белән ел саен Казан Идел буе федераль университетында узучы Луиса Браун исемендәге инглиз телендә хокукый консультация бирү халыкара конкурсын үткәрүдә һәрьяклап ярдәм күрсәтү турында шартнамә төзелде.

Татарстан делегациясе әгъзалары 32 Россия субъектларының әйдәп баручы югары уку йортлары, “ЮРИСТ” Россия хокукый газктасы белән элемтә урнаштырдылар. Санкт-Петербург дәүләт университеты хокукый клиникасы җитәкчесе Казан студентларын университетның хокукый клиникасына стажировкага чакырды.

Татарстан делегатлары Россия юридик клиникалар Ассоциациясенә кушылырга чакыру алдылар.

Секцияләрдә эшләгәннән соң Таврия сараенда форумда катнашучылар Россия юристлары Ассоциациясе әгъзалары белән очраштылар. Анда формаль булмаган шартларда Россия юриспруденциясе алдынгылары белән күрешеп-сөйләшергә мөмкинлек булды. Форумда катнашучылар өчен РФ Конституцион Судына һәм Б.Н.Ельцин исемендәге китапханәгә экскурсия оештырылган иде.

Форумда Ассоциация Идарәсе яшь юристлар өчен грант нигезендә өч юнәлештә конкурс үткәрү турында игълан итте: Россия юристлары Ассоциациясенең яшьләр сайтын булдыру, яшьләр хәрәкәтенең үсеше һәм хокукый тематикадагы социаль реклама.

Татарстан Республикасы яшь юристлар Бердәмлегенең әгъзалары барлык конкурс грантларында катнашырга карар кабул иттеләр.

 

ТР Юстиция министрлыгының Матбугат Үзәге