Казан шәһәрендә яшәүче гражданнарның аерым категорияләренә түләүсез юридик ярдәм күрсәтү турында

2010 елның 14 июлендә “Казан шәһәрендә яшәүче гражданнарның аерым категорияләренә түләүсез юридик ярдәм күрсәтү турында” Казан шәһәре муниципаль берәмлегенең башкарма комитеты карары кабул ителде. Бу документ нигезендә Казан шәһәрендә яшәүче гражданнарның аерым категорияләренә түләүсез юридик ярдәм күрсәтү тәртибе расланды.

Казан шәһәре башкарма комитетының районнары администрацияләрендә, Торак-коммуналь хуҗалык, җир һәм милек мөнәсәбәтләре комитетларында, торак сәясәте, архитектура һәм шәһәр төзү идарәләрендә, башкарма комитеты аппаратының хокук идарәсендә атна саен Казан шәһәрендә яшәүче гражданнарның аерым категорияләренә түләүсез юридик консультацияләр үткәрелә.

Түләүсез юридик ярдәм Бөек Ватан сугышы ветераннарына, сугышта катнашканнарга, Бөек Ватан сугышы һәм сугышлар инвалидларына; өч яисә аннан күбрәк балалы гаиләләр әгъзаларына; ундүрт яшен тутырмаган балалы ялгыз аналарга (баласы инвалид булса – унсигез яшькә кадәр), шундый балаларны анасыз тәрбияләүче башка затларга; аз керемле гаиләләргә һәм аз керемле ялгыз гражданнарга, шулай ук тормышның авыр шартларына дучар булган гражданнарга күрсәтелә.

Юридик ярдәм салым һәм җыемнар турындагы законнар, пенсия турындагы законнарга бәйле булмаган гражданлык законнары мәсьәләләре буенча телдән консультацияләр бирү рәвешендә күрсәтелә, әмма гариза бирүче һәм җирле үзидарә органнары арасындагы мөнәсәбәтләргә кагыла торган бәхәсләр булган очраклар, шулай ук эшкуарлыкка бәйле мәсьәләләр буенча консультацияләр бирелми.

Шәһәр башкарма комитетының идарәләрендә һәм комитетларында әлеге органнарның компетенцияләренә һәм вәкаләтләренә кагыла торган мәсьәләләр буенча гына түләүсез юридик ярдәм күрсәтелә.

 

ТР юстиция министрлыгы матбугат үзәге «Гарант» компаниясе материаллары буенча