Гадәттән тыш хәлләргә дучар булган гражданнарга бер тапкыр бирелә торган матди ярдәм күрсәтү турында

РФ Хакимияте тарафынна Россия Сәламәтлек һәм социаль үсеш министрлыгы әзерләгән закон проекты каралачак. Бу документ РФ Хакимиятенә һәм РФ субъектларының дәүләт хакимият органнарына табигати һәм техноген характердагы гадәттән тыш хәлгә дучар булган гражданнарга бер тапкыр бирелә торган матди ярдәм күрсәтү вәкаләтләрен бирү турында. Закон проекты әлеге ярдәмне күрсәтүче затларны һәм очракларны билгели. Төзәтмәләр “Халыкны һәм территорияләрне табигати һәм техноген характердагы гадәттән тыш хәлләрдән саклау турында” 1994 елның 21 декабрендәге 68-ФЗ номерлы Федераль законның 10-11 статьяларына кертелә.

Законның 18 статьясы нигезендә бүгенге көндә гражданнар аларның сәламәтлекләренә һәм милекләренә гадәттән тыш хәлләр нәтиҗәсендә зыян килгән өчен зыянны каплатуга хокуклы. Әмма әлеге статьяның 2 пункты нигезендә гражданнарга бирелә торган компенсацияләр тәртибе, шартлары, күләмнәре һәм башка гарантияләр параметрлары закон тарафыннан билгеләнгән булырга тиеш. Бүгенге көнгә кадәр бу беркайда да беркетелмәгән иде. Бәлага дучар булган халыкны социаль яклау турында нигезләмәләрне раслый торган бердән-бер акт булып Россия Сәламәтлек һәм социаль үсеш министрлыгының 08.11.2005 елдагы 662 номерлы боерыгы тора. Әлеге документта гадәттән тыш хәлләрне булдырмау һәм бетерү системасы кысаларында халыкка бер тапкыр бирелә торган ярдәм күрсәтелергә тиешлеге билгеләнгән.

РФ Хакимияте башта элегрәк законда язылганча бәлага дучар булганнарга ашыгыч компенсация күләмен 5 мең сум түгел, ә 10 мең сум, гаиләләргә 50 мең сум түгел, ә гаилә әгъзасы саен 100 әр мең сум бирүне законлаштырачак. Төзәтмәләр кертү очракларында вәкаләтләр рәсми рәвештә РФ Хакимияте һәм Россия субъектларының дәүләт органнары арасында бүленәчәк.

 

РФ Хакимиятенең рәсми сайты материалларыннан алынды