“Татарстан Республикасында инновация эшчәнлеге турында” Законга кул куелды

2010 елның 2 августында “Татарстан Республикасында инновация эшчәнлеге турында” 63-ТРЗ номерлы Законга кул куелды. Әлеге Законда Татарстан Республикасы инновация сәясәтенең максатлары, бурычлары һәм принциплары билгеләнгән.

Югарыда күрсәтелгән Закон нигезендә дәүләт тарафыннан республика территориясендә инновация эшчәнлегенә ярдәм күрсәтү чараларын билгеләү һәм гамәлгә ашыру белән бәйле барлыкка килә торган мөнәсәбәтләр җайга салынган, инновация эшчәнлеге субъектлары һәм аны тоту шартлары билгеләнгән. Инновация эшчәнлеге субъектлары булып, әлеге эшчәнлекне гамәлгә ашырган вакытта, физик һәм юридик затлар тора.

Республикада инновация эшчәнлеген үстерү максатында максатчан инновация программалары эшләнә. Дәүләт ярдәменә дәгъва кылучы инновация проектлары каршына куела торган төп таләпләр билгеләнгән. Дәүләт ярдәменә дәгъва итүче инновация проектын тәкъдим итү тәртибе, һәм дәүләт ярдәмен күрсәтмәү сәбәпләре инновация эшчәнлеге өлкәсендә башкарма хакимиятнең вәкаләтле органы тарафыннан билгеләнә.

Инновация эшчәнлеге өлкәсендә Татарстан Республикасы дәүләт хакимияте органнарының вәкаләтләре, инновация эшчәнлеген дәүләт тарафыннан җайга салу формалары һәм ысуллары, дәүләт тарафыннан ярдәм күрсәтүнең формалары һәм шартлары билгеләнгән. инновация эшчәнлегенең дәүләт тарафыннан ярдәм инновация проектының үз бәясен кайтару срогы чорына күрсәтелә, әмма бу срок аны практик рәвештә гамәлгә кертү мизгеленнән алып җиде елдан артык вакыт үтәргә тиеш түгел. Инновация продуктын үзләштерү һәм таратуны дәүләт тарафыннан хуплау билгеле бер вакыт чорына бирелә, һәм бу чор эчендә продукт инновация проекты дип саналырга тиеш була.

Закон рәсми басылып чыкканнан соң 10 көн узгач үз көченә керә.

Закон тексты "Республика Татарстан" газетасының 06.08.2010 елдагы 159 номерында, "Ватаным Татарстан" газетасының 07.08.2010 елдагы 160 номерында дөнья күрде.

  

ТР Юстиция министрлыгы Матбугат Үзәге