Татарстанда COVID-19 пандемиясе рәсми рәвештә тәмамланды
Бүген Татарстан Республикасы Юстиция министрлыгы Татарстан Республикасы хокукый мәгълүматларының рәсми порталында Татарстандагы барлык ковидка каршы чикләүләрне гамәлдән чыгаручы Министрлар Кабинеты карарын бастырып чыгарды.
Татарстан Республикасы Юстиция министрлыгы тарафыннан әзерләнгән Татарстан Республикасы Министрлар Кабинетының аерым актларын үз көчләрен югалткан дип тану турындагы карарга республика премьер-министры кул куйды.
“Документ нигезендә 88 акт үз көчен югалткан. Үз вакытында бу актлар белән билгеле бер карантин чикләүләре кертелгән иде. Исегезгә төшерәбез, татарстанлылар үзизоляцияне сакларга һәм шәһәр буйлап йөрү өчен пропуск алырга тиеш иде. Республикада төнге клублар (дискотекалар), барлар һәм ял һәм күңел ачу индустриясенең башка оешмалары эшчәнлегенә, рестораннарда, барларда, кафеларда һәм башка җәмәгать урыннарында кальян тартуга тыю билгеләнгән иде.
Моннан тыш, ял, тамаша-күңел ачу, физкультура, спорт, күргәзмә, мәгърифәтчелек, реклама чараларында катнашучылар саны чикләнде, ә ЗАГС органнары никахлашуларда кунаклар санын киметергә тиеш булды. Әлбәттә, эпидемиологик хәл яхшырган саен чикләүләр әкренләп киметелде”, - диде Татарстан Республикасы юстиция министры Рөстәм Заһидуллин.