ТР Юстиция министрлыгы хезмәткәрләре Самарадагы коллегалары белән муниципаль регистрны алып бару тәҗрибәсен уртаклаштылар
Юстиция министрлыгында министр урынбасары Мөхәррәм Ибәтов җитәкчелегендә Самара өлкәсенең мәгълүмат технологияләре һәм элемтә департаменты вәкилләре белән видеоконференц-элемтә режимында киңәшмә узды.
Киңәшмә барышында яклар муниципаль норматив хокукый актлар регистрын алып барганда мәгълүмати технологияләрне куллану тәҗрибәсе турында фикер алыштылар.
Җирле үзидарә һәм муниципаль регистрны алып бару өлкәсендә норматив хокукый эш бүлеге башлыгы Ралия Гарифуллина җирле үзидарә органнарының актларны Татарстан Республикасының рәсми хокукый мәгълүмат порталында бастырып чыгару эше ничек оештырылганын күрсәтте.
2020 елдан рәсми портал республиканың муниципаль регистры белән интеграцияләнгән. Актларны порталда урнаштырганда аларны бер үк вакытта рәсми рәвештә бастыруга һәм регистрга җибәрүгә ирешелә.
Татарстан Республикасы Мәгълүмати технологияләр үзәге проектлары җитәкчесе Олег Шабалов мәгълүмати технологияләрне муниципаль норматив хокукый актларны исәпкә алу – программа тәэминаты – RPA роботын алга таба камилләштерү мәсьәләләре турында хәбәр итте.
RPA роботы автомат режимда актларны рәсми порталдан ала һәм аларны регистрга кертә. Агымдагы елда робот 17 меңнән артык актны үзлегеннән эшкәрткән.
“Юстиция министрлыгы тарафыннан дөнья юстициясе, нормалар төзү һәм түләүсез юридик ярдәм өлкәсендә цифрлы трансформация проектлары гамәлгә ашырыла. Эштә заманча технологияләрне куллану Татарстан Республикасы Рәисе Рөстәм Миңнеханов ярдәме белән башкарыла”, - дип билгеләп үтте Мөхәррәм Ибәтов.