Норматив хокукый актлар һәм норматив хокукый актлар проектларына коррупциягә каршы бәйсез экспертиза уздыру буенча экспертлар Татарстан Юстиция министрлыгында укулар узды
Татарстан Республикасы Юстиция министрлыгында республикада норматив хокукый актларга һәм норматив хокукый актлар проектларына коррупциягә каршы бәйсез экспертиза үткәрүче аккредитацияләнгән экспертлар укытылды. Әлеге укуның максаты - коррупциягә каршы экспертиза һәм норматив актлар проектларын юридик-техник рәсмиләштерү өлкәсендә бәйсез экспертларның һөнәри компетенцияләрен күтәрү.
Чараны ачуда сәламләү сүзе белән юстиция министрының беренче урынбасары Илья Гомзик чыгыш ясады. Илья Александрович коррупциягә каршы экспертизаның мөһимлеген дәүләттә коррупцияне профилактикалауның төп чараларының берсе буларак билгеләп үтте. Ул ассызыклаганча, бу тема процесста катнашучыларның барысыннан да җитди караш һәм игътибар таләп итә.
Укуларда коррупциягә каршы бәйсез экспертизаның гражданлык җәмгыятенең мөһим институты булып торуы һәр аның гражданинга норматив актларны яхшыртуда һәм аларны коррупция факторларыннан чистартуда катнашырга мөмкинлек бирүе турында әйтелде.
“Әгәр үткәнгә мөрәҗәгать итсәк, күп кенә түрәләрнең шәхси файда алу өчен законнардагы кайбер юлларны еш кулланганын күрергә мөмкин. Бу бигрәк тә дәүләт хезмәтләре һәм муниципаль хезмәтләр күрсәтү регламентларында еш очрый, анда мөрәҗәгать итүчеләрдән чикләнмәгән документлар пакеты таләп ителергә мөмкин. Мәсәлән, бер мөрәҗәгать итүчедән нибары ике документ соралган булса, икенчесеннән әллә ничә өстәмә белешмәләр таләп итәргә мөмкиннәр”, - дип аңлатты ТР Рәисе идарәсенең коррупциягә каршы сәясәт мәсьәләләре буенча баш советнигы Александр Лохотской.
Ел саен республикада шактый санда норматив хокукый актлар эшләнә, шуңа бәйле рәвештә аларның коррупциягә каршы нәтиҗәле экспертизасы аеруча мөһим.
Бу елның 9 ае мәгълүматларына караганда, бәйсез экспертлар үз активлыгын көчәйткән. Аерым алганда, 40 республика акты проектына һәм 30га якын муниципаль акт проектына бәяләмә тәкъдим ителде. Экспертлар махсус алар өчен булдырылган хокукый мәгълүмат порталын куллана башлады. Бу порталда һәркем акт проектлары белән таныша, хокук бозуларны ачыклый һәм үз нәтиҗәләрен эшләүчеләргә җибәрә ала.
Моннан тыш, “Татарстан Республикасының коррупциягә каршы сәясәтен гамәлгә ашыру” республика программасы нигезендә ел саен коррупциягә каршы бәйсез экспертиза уздыру буенча экспертлар конкурсы үткәрелә, аның кысаларында акчалата призлар каралган. Җиңүчеләр 9 декабрьдә уза торган коррупциягә каршы республика форумы кысаларында тантаналы чарада бүләкләнәләр. Бу актив экспертлар өчен ярдәм чарасы булып хезмәт итә.
Быел конкурста катнашу өчен гаризалар бирүнең соңгы көне калды. Барлык нечкәлекләрне сылтама буенча табарга мөмкин.