Татарстан Югары Судында республика Судьялары советы утырышы булды
Татарстан Республикасы Судьялары советы утырышында юстиция министры урынбасары Марат Низамиев Министрлыкның 2024 елда республика җәмәгать судьялары эшчәнлеген матди-техник, оештыру-методик һәм финанс белән тәэмин итү өлкәсендәге эшенә йомгаклар турында сөйләде. Докладында ул “Татарстан Республикасында юстицияне үстерү” дәүләт программасы ярдәмендә ирешелгән шактый алга китешне билгеләп үтте.
“Дәүләт программасы ярдәмендә Дәрвишләр бистәсендә суд участокларын урнаштыру белән бәйле күпьеллык проблема хәл ителде. Агымдагы елның декабрендә Министрлык 479 квадрат метр мәйданлы бина алды. Марат Фәрит улы шулай ук ел ахырына кадәр җәмәгать судьяларының эш шартларын яхшырту өчен бинада косметик ремонт үткәрү планлаштырыла, дип өстәде. Моннан тыш, Мөслим районында җәмәгать судьясының суд участогын урнаштыру мәсьәләсе дә күтәрелде. “2025 елның беренче кварталында ук җәмәгать судьясы һәм аның аппараты яңа бинага күчәчәк, ул аларга лаеклы хезмәт шартлары тәэмин итәчәк”, - дип хәбәр итте ул.
Суд участокларын заманча техник сак чаралары белән тәэмин итү җәмәгать судьялары һәм аларның аппаратлары эшенең куркынычсызлыгының мөһим аспекты булып тора. Барлык биналар стационар һәм күчерелмә металлодетекторлар, эчке һәм тышкы күзәтү видеокамералары, тревога сигнализациясе төймәләре һәм керү контроле системалары белән җиһазландырылган, бу хезмәткәрләр һәм бирегә килүчеләр өчен куркынычсыз шартлар тудыра.
Министр урынбасары шулай ук документларны электрон рәвештә тапшыру сервисының популярлыгы артуына игътибар итте. “2024 елның тугыз аенда 114 меңнән артык гариза бирелгән, бу 2023 елның шул ук күрсәткеченнән ике тапкырга артык”, - дип белдерде ул.
Исегезгә төшерәбез, җәмәгать судьяларының барлык суд участокларында электрон гадел хөкем системасы кертелде. Гариза бирү өчен:
- Җәмәгать судьялары порталында “Шәхси кабинет” ачарга;
- “Процессуаль документ бирергә” опциясен сайларга, мөрәҗәгать итү ысулын күрсәтергә һәм кирәкле мәгълүматларны тутырырга;
- җәмәгать судьясы участогын, эш тибын һәм башка параметрларны билгеләргә;
- электрон документ төрен сайларга һәм аны судка җибәрергә кирәк.
Үз документларыңның статусын “Минем документлар” бүлегендә күзәтергә мөмкин.