Татарстанның ерак районнарында яшәүче 200дән артык кеше түләүсез юридик ярдәм алды
Ел дәвамында Татарстан дәүләт юридик бюросы белгечләре, халыкның ташламалы категорияләре өчен хокукый консультацияләр уздыру өчен, республиканың төрле районнарына даими чыгып торалар. Мондый сәяхәтләр “Татарстан Республикасында юстицияне үстерү” дәүләт программасы кысаларында гамәлгә ашырыла.
Күчмә эшчәнлек түләүсез юридик хезмәтләр күрсәтү географиясен шактый киңәйтте, шул рәвешле ерак торак пунктларда яшәүчеләр өчен хокукый ярдәм алу мөмкинлеген арттырды. Бер ел эчендә республиканың күп районнарына, шул исәптән Апас, Әтнә, Буа, Балтач, Югары Ослан, Биектау, Кукмара, Кама Тамагы, Яңа Чишмә һәм Балык Бистәсе районнарына 25 тапкыр чыгу оештырылды.
2024 елда квалификацияле юридик консультацияләр республика районнарында яшәүче 130 га якын кешегә бирелде. Ярдәм сорап еш кына хәрбиләр һәм аларның гаилә әгъзалары, беренче һәм икенче төркем инвалидлар, шулай ук күп балалы гаиләләр мөрәҗәгать иткән. Җир һәм торак законнарына, шулай ук мирас хокукына кагылышлы мәсьәләләр буенча аңлатмаларга аеруча ихтыяҗ зур булып чыкты. Халык балаларына торакка хокук рәсмиләштерү, алимент йөкләмәләрен билгеләү һәм үтәү, шулай ук махсус хәрби операциядә катнашучылар өчен бер тапкыр бирелә торган түләүләр алу белән актив кызыксына.
Гадәттәгечә Дәүләт юридик бюросы хезмәткәрләре ТР Хезмәт, халыкны эш белән тәэмин итү һәм социаль яклау министрлыгы тарафыннан республика халкына бушлай юридик ярдәм күрсәтү көннәрендә видеоконференция режимында катнашалар. Бу форматта 12 кабул итү узды, аларда 78 кеше ярдәм алды.