ТР Юстиция министрлыгы: муниципаль актларның 80% ы регистрга робот ярдәмендә кертелгән
Татарстан Республикасы Юстиция министрлыгы җирле үзидарә органнары белән актив һәм тыгыз хезмәттәшлек итә, аларга тиешле хокукый ярдәм күрсәтә. Бу хезмәттәшлек шул исәптән нормалар иҗат итү, тапшырылган дәүләт вәкаләтләрен гамәлгә ашыру, мөлкәти булмаган таләпләрне мониторинглау һәм башкалар кебек төрле мәсьәләләрне колачлый.
Министрлыкның вәкиллекле утырышында чыгыш ясаганда Рөстәм Заһидуллин җирле үзидарә органнары тарафыннан кабул ителә торган норматив хокукый актларның муниципаль регистрга кертелергә тиешлеген билгеләп үтте. 2024 елда Юстиция министрлыгы тарафыннан 35 меңнән артык акт кертелгән, бу эшнең 80% RPA роботы ярдәмендә башкарылган. Муниципаль актлар регистрына кертелә торган сан буенча Татарстан икенче ел рәттән Идел буе федераль округы буенча 1 нче урында тора.
Шулай ук министр сүзләренә караганда, хисап чорында 26 меңнән артык муниципаль актка экспертиза үткәрелгән. Нәтиҗәдә 544 коррупциоген фактор ачыкланган, ә 128 муниципаль актның нигезләмәләре законнарга каршы килгән. “Бүгенге көнгә 482 коррупциоген фактор, шулай ук 128 муниципаль акттагы законнарга туры килмәүләр бетерелде”, - дип хәбәр итте Рөстәм Илдус улы.
Моннан тыш, Министрлык хокук бозуларны профилактикалау буенча Хөкүмәт комиссиясе каршындагы муниципаль берәмлекләрдә хокук бозуларны профилактикалау эшен оештыруны өйрәнү буенча эшче төркем эшчәнлеген тәэмин итә.
Ел саен 8 муниципаль район колачлана. Эш нәтиҗәләре район җитәкчелеге, җирлек башлыклары, профилактика субъектлары һәм район прокурорлары катнашында тикшерелә, шулай ук Хөкүмәт комиссиясе утырышларында карала.
2025 елда эш төркеме Арча, Аксубай, Зәй, Бөгелмә, Актаныш, Азнакай, Саба, Балтач районнарына барачак.