Рөстәм Заһидуллин: Ватанны саклаучы сугышчыларның гаиләләренә ярдәм итү - безнең бурычыбыз
Бүген Татарстан Республикасы юстиция министры Рөстәм Заһидуллин махсус хәрби операциядә катнашучыларның гаиләләре белән очрашты. Очрашу барышында министр билгеләп үткәнчә, Министрлыкта эшли торган 19 хезмәткәрнең якын туганнары хәзерге вакытта махсус хәрби операция зонасында яки фронтта якыннарын югалтканнар.
Министр искәрткәнчә, Бөек Җиңүнең 80 еллыгын бәйрәм итү кысаларында, алда торган бурычларның мөһимлеген исәпкә алып, Татарстан Республикасы Рәисе 2025 елны Ватанны саклаучылар елы дип игълан итте. Ул шулай ук Рәиснең “Бу темага фикер алышмаган бер генә көн дә юк. Фикер алышу бөтен республика дәрәҗәсендә бара - һәр муниципалитет, һәр торак пункт, һәр предприятие махсус хәрби операциядә катнашучыларга һәм аларның гаиләләренә ярдәм программасына теге яки бу дәрәҗәдә җәлеп ителгән” дигән сүзләрен дә ассызыклады.
Рөстәм Заһидуллин билгеләп үткәнчә, Татарстан Республикасы Юстиция министрлыгы карамагындагы Татарстан Республикасы Дәүләт юридик бюросы сугышчыларга һәм аларның туганнарына актив рәвештә хокукый ярдәм күрсәтә. Махсус хәрби операциядә катнашучыларының гаиләләре еш очраша торган проблемаларның берсе - төрле документларда фамилия һәм исемнәр язудагы аермалыклар, бу суд тарафыннан туганлыкны раслауны таләп итә. Моннан тыш, тиешле ташламаларны һәм түләүләрне рәсмиләштерүгә бәйле кыенлыклар туа.
Хезмәткәрләр һәрвакыт Министрлык ягыннан ярдәмгә өметләнә ала, дип ышандырды министр. “Теләсә кайсы вакытта ярдәм сорап яки тәкъдимнәр белән мөрәҗәгать итегез. Безнең барыбыз өчен дә ачык әңгәмә алып бару мөһим. Без һәр ситуацияне игътибар белән карап, һәрвакыт тиешле ярдәм күрсәтергә әзер”, - дип ассызыклады ул.
Очрашу азагында Рөстәм Заһидуллин катнашучыларны Бөек Җиңүнең 80 еллыгын һәм Ватанны саклаучылар елын бәйрәм итү кысаларында узган “Реплика” әдәби-музыкаль театры спектакленә чакырды. Кунаклар шулай ук Татарстан Республикасы Юстиция министрлыгында экспозициясе республикада юстицияне торгызу һәм үстерүнең төп этапларына багышланган музеенда булдылар.