Татарстан Юстиция министрлыгында коллегия утырышы узды
Татарстан Республикасы юстиция министрының беренче урынбасары рәислегендә Татарстан Республикасы Юстиция министрлыгы коллегиясе утырышы узды, анда Юстиция министрлыгының җирле үзидарә органнары белән 2023 елның 6 аенда нормалар төзү эшчәнлеге мәсьәләләре буенча эш нәтиҗәләре турында фикер алыштылар.
Утырышта Россия Федерациясе Федераль Җыены Дәүләт Думасы депутаты Руслан Гаджиев, ТР Рәисенең территорияләр белән эшләү идарәсе башлыгы урынбасары Илдар Ибраһимов, Татарстан Республикасы Министрлар Кабинеты Аппаратының Хокук идарәсе башлыгы Марат Долгов, шулай ук җирле үзидарә органнарының юридик хезмәтләре җитәкчеләре, коллегия әгъзалары һәм Министрлыкның структур бүлекчәләре җитәкчеләре катнашты.
“Гадәттәгечә, август аенда без Министрлыкның җирле үзидарә органнары белән нормалар төзү эшчәнлеге мәсьәләләре буенча эшенә йомгак ясауга багышланган коллегия үткәрәбез”, - диде коллегия утырышын ачып Татарстан Республикасы юстиция министрының беренче урынбасары Айнур Галимов. Министрның беренче урынбасары катнашучыларны коллегиянең көн тәртибе һәм эш регламенты белән таныштырды.
Министр урынбасары Мөхәррәм Ибәтов, коллегиядә чыгыш ясаганда, Татарстан Республикасы муниципаль норматив хокукый актлар регистры муниципаль нормалар төзү торышын чагылдыручы мөһим мәгълүмати ресурс булып тора, дип билгеләп үтте. Хисап чорында регистрга узган ел дәрәҗәсендә диярлек 17 129 акт кертелгән. Регистрда барлыгы 264 меңнән артык акт бар. Җирле үзидарә органнары хәрбиләргә һәм аларның гаилә әгъзаларына ярдәм чараларын билгеләү буенча 1767 акт кабул иткән.
“6 ай нәтиҗәләре буенча Татарстан Идел буе федераль округы субъектлары арасында кертелгән муниципаль актлар саны буенча алда бара. 2022 елда Татарстан Түбән Новгород өлкәсеннән узып, 2 нче урында иде”, - дип ассызыклады Мөхәррәм Ибәтов.
Регистрда норматив актлар булу - Министрлыкның һәм җирле үзидарә органнарының законнарда билгеләнгән гомуми бурычы.
“Агымдагы елда регистрга кертү өчен 8 меңнән артык үзгәртү акты керде. Регистрда 482 төп (баштагы) акт юк дип билгеләнгән. 1 июльгә соралганнарның 40% ы алынмаган. Узган елдан калган өлеш 6%”, – дип билгеләп үтте министр урынбасары.
Министр урынбасары муниципаль регистрга кертелгән норматив актларны хокукый экспертизалау муниципаль нормалар иҗат итүнең сыйфатын күтәрүгә ярдәм итүче мөһим факторларның берсе дип аерым билгеләп үтте. Хисап чорында 12 132 муниципаль актка карата экспертизалар үткәрелде, ягъни узган ел белән чагыштырганда 9% ка күбрәк. 302 тискәре нәтиҗә ясалган.
“Агымдагы елда нәтиҗәләр ясау өчен сәбәп булып җирле салымнар буенча бурычларны, пенялар һәм штрафлар буенча бурычларны һәм башкаларны түләтүгә өметсез дип тануның өстәмә нигезләре турындагы карарларның законнарга туры килмәве тора”, - дип аңлатты ул.
Хокукый экспертиза барышында Министрлык тарафыннан җирле үзидарә органнарының 251 актында 271 коррупциоген фактор ачыкланган. Җирле үзидарә органнары узган ел белән чагыштырганда 163 коррупцияле факторны ачыклаган.
Мөхәррәм Ибәтов искә төшергәнчә, Татарстан Республикасы Конституциясе нигезендә барлык норматив хокукый актлар Татарстан Республикасы дәүләт телләрендә рәсми рәвештә бастырылырга тиеш. 2022 елда һәм 2023 елның I яртыеллыгында җирле үзидарә органнары тарафыннан билгеләнгән тәртиптә татар телендә бастырылган норматив хокукый актлар өлеше 100% ка җиткән.
2022 елның 4 апреленә республиканың хокукый мәгълүмат порталында 70 меңнән артык актның тәрҗемәләре юк. Агымдагы елның 1 августына бу сан 43% ка кимегән. Әмма 4 район бары тик 173 актны тәрҗемә иткән, гомуми бурыч 6 678 актка тиң.
“Муниципаль берәмлекләр җитәкчеләреннән закон таләпләрен үтәүне тәэмин итүләрен сорыйм”, - дип мөрәҗәгать итте министр урынбасары.
Татарстан Республикасы Юстиция министрлыгы 8 күрше субъект белән чикләрне билгеләү буенча документлар әзерләүдә актив катнашуын дәвам итә. “Субъект башлыклары белән килешүләр имзалау тәмамланды, республика Дәүләт Советы тарафыннан тиешле карарлар кабул ителде. Хәзерге вакытта чик Оренбург, Самара, Ульяновск өлкәләре, шулай ук Чувашия, Башкортостан һәм Марий Эл белән исәпкә куелган. Удмуртия һәм Киров өлкәсе белән чикләрне Росреестрда исәпкә кую буенча эш дәвам итә.
Коллегиядә муниципаль актларны мониторинглау һәм аларның федераль һәм республика дәрәҗәсендәге актларга туры килүе мәсьәләсе кискен тикшерелде. “Без бергәләп регистрда законга туры килмәгән актлар санын киметергә һәм аларны актуаль хәлдә тотарга тиешбез”, - диде министр урынбасары.
Чыгышы ахырында Мөхәррәм Мансур улы җирле үзидарә җитәкчелегенә һәм органнарына, прокуратурага, закон чыгару һәм башкарма хакимият органнарыннан коллегаларына, муниципаль берәмлекләр советына уртак эш өчен рәхмәт белдерде.
Россия Федерациясе Юстиция министрлыгының Татарстан Республикасы буенча идарәсе башлыгы урынбасары Татьяна Кравченко үз чыгышында Федераль регистрда муниципаль актларны исәпкә алганда ачыкланган төп хаталарны билгеләп үтте.
Татарстан Республикасы Яңа Чишмә муниципаль районы җирле үзидарә органнарының һәм Татарстан Республикасы Юстиция министрлыгының нормалар төзү эшчәнлеге мәсьәләләре буенча үзара хезмәттәшлеге турындагы доклад белән Татарстан Республикасы Яңа Чишмә муниципаль районы башлыгы урынбасары Надежда Попкова чыгыш ясады.
Татарстан Республикасы прокуратурасының федераль законнарның үтәлешенә күзәтчелек итү идарәсе норматив хокукый актларның законлылыгын күзәтү буенча 1 нче бүлеге прокуроры Оскар Юзлибаев муниципаль нормалар иҗат итүнең законлылыгын күзәтү турында хәбәр итте.
Коллегия традицион рәвештә бүләкләр тапшыру белән тәмамланды.