ЯҢАЛЫКЛАР

2007 елның беренче ярты еллыгында комарлы уеннарны оештыру һәм үткәрү эшчәнлеген җайга салу турында законнарда булган үзгәрешләр (“Комарлы уеннарны оештыру һәм үткәрү эшчәнлеген дәүләти җайга салу һәм Россия Федерациясенең аерым закон актларына үзгәрешләр кертү турында” 2006 елның 29 декабрендәге 244-ФЗ номерлы Федераль законның көченә керүе, “Татарстан Республикасы территориясендә урнашкан уен йортлары эшчәнлеген җайга салу турында” 2005 елның 14 октябрендәге 102-ТРЗ номерлы Татарстан Республикасы Законының көчен югалтуы) Татарстан Республикасында уен йортларын урнаштыру мәсьәләсен җайга салучы Татарстан Республикасы Министрлар Кабинеты актларын актуаль халәткә китерү зарурлыгын барлыкка китерде.

2007 елның 24 июлендә “Кече һәм урта бизнесны үстерү турында” 209 номерлы Федераль закон кабул ителде, ул, аерым нигезләмәләрне санамаганда, 2008 елның 1 гыйнварыннан көченә керә. Закон кече һәм урта эшкуарлык субъектларын хезмәткәрләре саныннан (микропредприятие – 15 кешегә кадәр; кече предприятие – 100 кешегә кадәр; урта предприятие – 100 кешедән 250 кешегә кадәр), шулай ук хисап чорында товарларны (эшләрне, хезмәт күрсәтүләрне) гамәлгә куюдан кергән керем күләменнән һәм Россия Федерациясе Хөкүмәте тарафыннан билгеләнә торган чик зурлыкларны артып китәргә тиеш булмаган активларның баланс хакыннан чыгып категорияләргә кертүнең төп критерийларын билгели.

2006 елның сентябреннән, ТР Министрлар Кабинеты тарафыннан Күчемсез мөлкәт белән килешүләрне дәүләт теркәвенә алу өчен документларны рәсмиләштерүнең универсаль регламентлары расланганнан соң, ТР Юстиция министрлыгы мондый документларны теркәүгә алуга әзерләүне оештыруны һәм контрольдә тотуны гамәлгә ашыра. Бу максатларда Федераль теркәүгә алу хезмәтенең ТР буенча идарәсендә теркәүгә алуга кадәр әзерлек залы эшли, анда тәҗрибәле белгечләр гражданнарга аларның торакка, җир кишәрлекләренә һәм күчемсез мөлкәтнең башка объектларына хокукларын теркәүгә алу өчен зарур булган барлык кирәкле документларны тиз һәм хатасыз рәсмиләштерергә ярдәм итәләр.

Яңа уку елына бер төркем урта һөнәри белем бирү учреждениеләре – ПТУ, колледжлар һәм лицейлар - автономияле учреждениеләргә үзгәртеп төзелергә тиеш. Безнең республика хөкүмәте алдына шундый бурыч куелган. Элеккеге бюджет учреждениеләренең формасын үзгәртү аларга үсешләре өчен өстәмә финанс чаралары җәлеп итәргә мөмкинлек бирәчәк. Моннан тыш, хуҗалык итүнең яңа шартлары уку йортларының үз хезмәткәрләренең хезмәт хакын сизелерлек күтәрергә мөмкинлек бирә, әлбәттә, аларның хезмәтләренә халык арасында сорау булса.

Безнең республикада үткәрелә торган коррупциягә каршы көрәш, аның иң актив оештыручыларыннан һәм катнашучыларыннан берсе - ТР Юстиция министрлыгы, законнар белән җитди тәэмин итүне таләп итә. Бүгенге көндә башкарма хакимият органнарына керүче норматив хокукый актларга Министрлык тарафыннан коррупциягә каршы экспертиза үткәрелә. Чиратта –җирле үзидарә органнарының норматив хокукый актлары проектларына коррупциягә каршы экспертиза үткәрү тәртибен эшләү һәм раслау, дәүләт һәм муниципаль органнарда коррупциягә каршы эшне үтәү өчен җаваплы вазыйфаи затларны укытуны оештыру.

2007 елның 27 июлендә ТР Юстиция министрлыгында мәгариф кластерлары өлкәсендә автономияле учреждениеләр төзү мәсьәләсе буенча киңәшмә булды. Билгеле булганча, “Автономияле учреждениеләр турында” 2006 елның ноябрендә кабул ителгән Федераль закон нигезендә хәзерге вакытта гамәлдә булган дәүләт бюджет учреждениеләре белән чагыштырганда күбрәк мөстәкыйльлеккә ия мондый учреждениеләр фән, мәгариф, сәламәтлек саклау, мәдәният, социаль яклау, халыкның эш белән тәэмин ителеше, физик культура һәм спорт өлкәләрендә төзелә ала.

Кичә Татарстан Республикасы Министрлар Кабинетында ТР Премьер-министрының беренче урынбасары Р.Ф.Моратов рәислегендә “Автономияле учреждениеләр турында” Федераль законны гамәлгә ашыру мәсьәләсе буенча киңәшмә үтте, анда Татарстан Республикасы юстиция министры М.М.Корманов һәм министрның беренче урынбасары С.Н.Столяров катнаштылар.

2007 елның 26 июлендә Биектау районында Татарстан Республикасы юстиция министры М.М.Корманов Биектау муниципаль районы башлыгы Н.А.Сәгъдиев белән очрашты, алар Биектау районы чиген үзгәртү турында фикер алыштылар.

Татарстан Республикасы Министрлар Кабинетында Татарстан Республикасы юстиция министры М.М.Корманов Татарстан Республикасы Премьер-министры Р.Н.Миңнеханов белән очрашты, анда “Татарстан Республикасында җәмәгать судьялары суд участокларын һәм җәмәгать судьялары вазыйфаларын булдыру турында” Татарстан Республикасы Законына үзгәрешләр кертү хакында” ТР законы проекты, шулай ук җәмәгать судьялары эшчәнлеген матди-техник тәэмин итү мәсьәләсе, Татарстан Республикасы җәмәгать судьялары тарафыннан хөкем чыгаруны яхшырту юллары һәм чараларын эзләү турында фикер алышынды.