ЯҢАЛЫКЛАР

Бүген Казан Кремленең “Эрмитаж” музее бинасында Муниципаль берәмлекләр советының икенче съездына әзерлеккә багышланган киңәшмә үтте, аның эшендә Татарстан Республикасы юстиция министры М.М. Корманов һәм ТР юстиция министры урынбасары – Хокукый мәсьәләләр буенча җирле үзидарә органнары белән багланышлар оештыру департаменты җитәкчесе А.А. Ощепков катнашты.

2007 елның 25 апрелендә Татарстан Республикасы Юстиция министры урынбасары – Хокукый мәсьәләләр буенча җирле үзидарә органнары белән багланышлар оештыру департаменты җитәкчесе А.А. Ощепков Татарстан Республикасы Төзелеш, архитектура һәм торак-коммуналь хуҗалык министрлыгы коллегиясе утырышында катнашты. Анда 2007 елның беренче кварталында республиканың төзелеш һәм торак-коммуналь комплекслары эше нәтиҗәләре чыгарылды һәм киләсе кварталга бурычлар билгеләнде.

Кичә Татарстан Республикасы Министрлар Кабинетында Татарстан Республикасы Премьер-министрының беренче урынбасары Р.Ф.Моратов рәислегендә Хокукый мәсьәләләр буенча ведомствоара координацияләү комитетының чираттагы утырышы булды. Көн тәртибенә берничә мәсьәлә куелган иде.

2007 елның 23-25 апрелендә Татарстан Республикасы юстиция министры, ю.ф.к. М.М.Корманов Россия Федерациясендә, Канада тәҗрибәсен исәпкә алып, закон иҗат итү процессын камилләштерү мәсьәләләренә багышланган конференциядә катнашты. Ул Уфа шәһәрендә Башкортстан Республикасы Корылтаеның Дәүләт Җыены Йортында узды.

Мидхәт Мәзгутович “Федераль закон иҗат итү процессында Россия Федерациясе субъектының закон чыгару органының һәм Россия Федерациясе Хөкүмәтенең үзара мөнәсәбәтләре” дигән доклад белән чыгыш ясады. Анда сүз РФ субъектлары дәүләт хакимиятенең закон чыгару органнарының федераль закон иҗат итү процессында катнашуы һәм аларның Россия Федерациясе Хөкүмәте белән үзара мөнәсәбәтләре турында барды.

2007 елның 24 апрелендә Татарстан Республикасы Юстиция министрлыгында 2006 елның 16 октябрендә кабул ителгән 516 номерлы Татарстан Республикасы Министрлар Кабинеты карары белән расланган Татарстан Республикасының Коррупциягә каршы сәясәт стратегиясен гамәлгә ашыруның Республика программасын тормышка ашыру буенча эшче төркем утырышы булды. Анда 2006-2008 елларга Татарстан Республикасының Коррупциягә каршы сәясәт стратегиясен гамәлгә ашыруның Республика программасы чараларын үтәү йомгаклары чыгарылды.

Бүген ТР юстиция министрының беренче урынбасары С.Н.Столяров Татарстан Республикасында административ реформаның барышы турындагы мәсьәлә хакында фикер алышынган брифингта катнашты. Сергей Николаевич үз чыгышында Россия Федерациясендә һәм Татарстан Республикасында хакимиятнең башкарма органнары тарафыннан дәүләт хезмәте күрсәтелүнең административ регламентларын эшләү һәм хокукый җайга салу, гамәлдәге законнарның камил булмавы һәм регламентлар эшләү белән бәйле проблемалар турында сөйләде; норматив хокукый актларга коррупциячеллеккә каршы экспертиза һәм бу мәсьәләне хәл итүдә ТР Юстиция министрлыгының тоткан урыны мәсьәләләренә дә тукталды.

Традиция буенча һәр елның апрель аенда шәһәр халкы, учреждениеләр, министрлыклар, ведомстволар хезмәткәрләре, предприятиеләр эшчеләре, мәктәп укучылары кыштан соң май бәйрәмнәре алдыннан чисталык һәм тәртип урнаштыру өчен шимбә өмәсенә чыга. 21 апрельдә - шәһәркүләм шимбә өмәсе көнендә - Татарстан Республикасы Юстиция министрлыгы коллективы ведомстводагы территориаль учреждениеләр хезмәткәрләре белән бергә министр М.М.Корманов җитәкчелегендә территорияләрне һәм биналарны чистартты һәм матурлады.

20 апрельдә Казан ратушасында Татарстан Республикасы Президенты М.Ш.Шәймиев һәм РФ Президентының Идел буе федераль округында вәкаләтле вәкиле А.В.Коновалов катнашында “Административ реформа: федераль тәҗрибә һәм аны Россия Федерациясе субъектларында гамәлгә ашыру үзенчәлекләре” темасына “түгәрәк өстәл” утырышы булды, аны РФ Хөкүмәте Аппараты җитәкчесе – Россия вице-премьеры С.Е.Нарышкин үткәрде.

Бүген «Татмедиа» агентлыгының брифинг-залында Россия Федерациясе торак законнарындагы үзгәрешләргә багышланган матбугат очрашуы булды. Аерым алганда, анда РФ Торак кодексына идарәче оешманы сайлау проблемаларына кагылышлы үзгәрешләр турында мәсьәлә каралды.

Татарстан Республикасы Юстиция министрлыгы вәкиле сыйфатында матбугат конференциясендә закон проектлары белән эшләү бүлегенең әйдәүче белгече Е.В.Лопатина катнашты.

2007 елның 20 апрелендә «Татарстан Республикасында гражданнар җәмгыяте формалашу факторы буларак җирле үзидарә үсеше” темасына ТР Җәмәгать палатасы һәм ТР Муниципаль берәмлекләр советы оештырган конференция узды. Конференция фәнни-гамәли характерда иде, анда ТР Җәмәгать палатасы, ТР Муниципаль берәмлекләр советы, ТР муниципаль берәмлекләре, ТР Президенты Аппараты, ТР Дәүләт Советы Аппараты, ТР Министрлар Кабинеты Аппараты, министрлыклар вәкилләре һәм галимнәр катнашты.